സ്ത്രീകളുടെ ശാരീരികവും മാനസികവുമായ ആരോഗ്യത്തിന് ഡാർക്ക് ചോക്ലേറ്റുകൾ മികച്ചതാണെന്ന് ആരോഗ്യ വിദഗ്ധർ ചൂണ്ടിക്കാണിക്കുന്നു. സ്ത്രീകളുടെ ഹോർമോൺ സന്തുലിതാവസ്ഥയ്ക്കും മാനസിക ഉന്മേഷത്തിനും ആവശ്യമായ നിരവധി പോഷകങ്ങളുടെ ഒരു കലവറയാണ് ഡാർക്ക് ചോക്ലേറ്റ്. 70 ശതമാനമോ അതിൽ കൂടുതലോ കൊക്കോ (Cocoa) അടങ്ങിയ ഡാർക്ക് ചോക്ലേറ്റ് കഴിക്കുന്നത് സ്ത്രീകളുടെ ശരീരത്തിൽ വരുത്തുന്ന ഗുണകരമായ മാറ്റങ്ങൾ എന്തൊക്കെയാണെന്ന് നോക്കാം:
ആർത്തവ വേദനയിൽ നിന്ന് ഉടനടി ആശ്വാസം
ആർത്തവസമയത്തുണ്ടാകുന്ന കഠിനമായ വയറുവേദന കുറയ്ക്കാൻ ഡാർക്ക് ചോക്ലേറ്റിന് സാധിക്കും. ഇതിലടങ്ങിയിരിക്കുന്ന മഗ്നീഷ്യം, ചെമ്പ് (Copper) എന്നിവ ഗർഭാശയ പേശികളെ അയവുവരുത്താൻ സഹായിക്കുന്നതാണ് ഇതിന് കാരണം.
ക്ഷീണം അകറ്റാൻ ഇരുമ്പിന്റെ അംശം
ആർത്തവചക്രത്തിനിടെ സ്ത്രീകൾക്ക് ശരീരത്തിൽ നിന്ന് വലിയ തോതിൽ ഇരുമ്പിന്റെ അംശം (Iron) നഷ്ടപ്പെടാറുണ്ട്. ഇത് കടുത്ത ക്ഷീണത്തിന് കാരണമാകുന്നു. എന്നാൽ, ഒരു ഔൺസ് ഡാർക്ക് ചോക്ലേറ്റിൽ ഏകദേശം രണ്ട് മില്ലിഗ്രാം ഇരുമ്പ് അടങ്ങിയിട്ടുണ്ട്. അതിനാൽ ആർത്തവത്തിന് ശേഷമുള്ള ദിവസങ്ങളിൽ ഡാർക്ക് ചോക്ലേറ്റ് കഴിക്കുന്നത് ക്ഷീണമകറ്റാൻ സഹായിക്കും.
പി.എം.എസ് (PMS) ലക്ഷണങ്ങളെ ലഘൂകരിക്കുന്നു
ആർത്തവത്തിന് മുന്നോടിയായി സ്ത്രീകളിൽ കണ്ടുവരുന്ന ഉത്കണ്ഠ, ദേഷ്യം, ഉറക്കമില്ലായ്മ തുടങ്ങിയ പ്രശ്നങ്ങൾക്ക് (Premenstrual Syndrome) ഡാർക്ക് ചോക്ലേറ്റിലെ മഗ്നീഷ്യം ഒരു മികച്ച പരിഹാരമാണ്. ഇത് നാഡീവ്യവസ്ഥയെ ശാന്തമാക്കാൻ സഹായിക്കുന്നു.
മാനസിക സമ്മർദ്ദവും (Stress) മൂഡ് മാറ്റങ്ങളും മാറ്റുന്നു
തുടർച്ചയായി രണ്ടാഴ്ച ഡാർക്ക് ചോക്ലേറ്റ് കഴിക്കുന്നത് സ്ത്രീകളിലെ സ്ട്രെസ് ഹോർമോൺ ആയ കോർട്ടിസോളിന്റെ (Cortisol) അളവ് ഗണ്യമായി കുറയ്ക്കുമെന്ന് പഠനങ്ങൾ വ്യക്തമാക്കുന്നു. ഇത് തലച്ചോറിനെ ഉത്തേജിപ്പിച്ച് എൻഡോർഫിനുകൾ, സെറോടോണിൻ, ഡോപാമൈൻ എന്നീ 'ഫീൽ ഗുഡ്' ഹോർമോണുകൾ പുറപ്പെടുവിക്കുന്നു. ഇത് ഉടനടി മാനസിക ഉന്മേഷം നൽകും.
ചർമ്മത്തിന് തിളക്കവും യുവത്വവും
ഡാർക്ക് ചോക്ലേറ്റിൽ ധാരാളമായി അടങ്ങിയിട്ടുള്ള ആന്റിഓക്സിഡന്റുകൾ ചർമ്മത്തിലേക്കുള്ള രക്തചംക്രമണം വർദ്ധിപ്പിക്കുന്നു. ഇത് ചർമ്മത്തിലെ ജലാംശം നിലനിർത്താനും, സൂര്യതാപം, അകാല വാർദ്ധക്യം എന്നിവയിൽ നിന്ന് ചർമ്മത്തെ സംരക്ഷിക്കാനും സഹായിക്കും.
ഡാർക്ക് ചോക്ലേറ്റ് ആരോഗ്യത്തിന് നല്ലതാണെങ്കിലും മിതമായ അളവിൽ മാത്രം കഴിക്കാൻ ശ്രദ്ധിക്കുക. ദിവസവും 30 മുതൽ 40 ഗ്രാം വരെ ചോക്ലേറ്റ് കഴിക്കുന്നതാണ് ആരോഗ്യത്തിന് ഏറ്റവും അനുയോജ്യം. അമിതമായി പഞ്ചസാര ചേർക്കാത്ത ചോക്ലേറ്റുകൾ തിരഞ്ഞെടുക്കാനും ശ്രദ്ധിക്കുക.
