സാംസംഗ് അണ്‍പാക്ക് ചെയ്യുന്ന പുതിയ മോഡലുകള്‍ ഏതൊക്കെ? SAMSUNG UNPACKED EVENT 2026

സ്മാ‍ർട്ട് ഫോൺ വിപണിയിലെ അതികായരായ സാംസം​ഗിന്റെ ​ഗാലക്സി അൺപാക്ക്ഡ് ഇവന്റിനായി (Samsung Galaxy Unpacked) ആകാംക്ഷയോടെയുള്ള കാത്തിരിപ്പിലാണ് ആരാധക‍ർ. ലണ്ടനിൽ ഇന്നു നടക്കുന്ന ​ഗാലക്സി അൺപാക്ക്ഡ് ചടങ്ങിൽ സാംസം​ഗ് തങ്ങളുടെ പുതിയ മോഡലുകൾ അവതരിപ്പിക്കും. ഔദ്യോഗികമായി കൂടുതൽ വിവരങ്ങളൊന്നും പുറത്തുവിട്ടിട്ടില്ലെങ്കിലും, പുതിയ തലമുറ ഗാലക്സി ഫോൾഡബിൾ ഫോണുകൾ സാംസം​ഗ് അവതരിപ്പിക്കുമെന്നാണ് പ്രതീക്ഷിക്കപ്പെടുന്നത്.

ഏറെ പ്രതീക്ഷയോടെ കാത്തിരിക്കുന്ന 'വൈഡ് ഫോൾഡ്' മോഡൽ ഉൾപ്പെടെ മൂന്ന് ഫോൾഡബിൾ ഫോണുകൾ സാംസം​ഗ് അവതരിപ്പിക്കാൻ സാധ്യതയുണ്ടെന്നാണ് റിപ്പോർട്ടുകൾ സൂചിപ്പിക്കുന്നത്. ഇതിനുപുറമെ, സാംസം​ഗിന്റെ ഗാലക്സി വാച്ച് 9, വാച്ച് അൾട്രാ 2 എന്നിവയും അരങ്ങേറ്റം കുറിക്കുമെന്നാണ് സൂചന. റിപ്പോർട്ടുകൾ പ്രകാരം, സാംസം​ഗ് ഗാലക്‌സി Z ഫോൾഡ് 8, ഗാലക്‌സി Z ഫോൾഡ് 8 അൾട്രാ, ഗാലക്‌സി Z ഫ്ലിപ്പ് 8 എന്നിങ്ങനെ മൂന്ന് പ്രധാന മോഡലുകൾ അവതരിപ്പിച്ചേക്കുമെന്നാണ് സൂചന. ഇന്ത്യയിലും ആഗോള വിപണികളിലും ഫോണുകൾക്കായുള്ള പ്രീ-റിസർവേഷൻ നടപടികൾ കമ്പനി ഇതിനകം ആരംഭിച്ചുകഴിഞ്ഞു.

നൂതനമായ ഹാർഡ്‌വെയറും അനുദിനം വള‍ർന്നുകൊണ്ടിരിക്കുന്ന എഐ സാങ്കേതികവിദ്യയും സംയുക്തമായി ഉപയോ​ഗപ്പെടുത്തിയാകും പുതിയ മോഡലുകളുടെ രൂപകൽപ്പനയെന്ന് കമ്പനി വ്യക്തമാക്കുന്നു. പുസ്തകം പോലെ തുറക്കാവുന്ന പരമ്പരാഗത 'ബുക്ക്-സ്റ്റൈൽ' രൂപകൽപ്പനയാണ് മുൻ മോഡലുകൾ പിന്തുടർന്നിരുന്നതെങ്കിൽ, വരാനിരിക്കുന്നത് വീതിയേറിയ ഫോൾഡബിൾ ഡിസൈനിലുള്ള (Foldable Design) മോഡലുകളാകുമെന്നാണ് റിപ്പോ‍ർട്ടുകൾ. ഫോൾഡബിൾ ഫോണുകൾക്കൊപ്പം ഗാലക്‌സി വാച്ച് 9, ഗാലക്‌സി വാച്ച് അൾട്രാ 2 എന്നിവയും സാംസം​ഗ് അവതരിപ്പിച്ചേക്കുമെന്നും സൂചനയുണ്ട്. 

ഏറെക്കാലമായി അഭ്യൂഹങ്ങൾ നിലനിൽക്കുന്ന സ്മാർട്ട് ഗ്ലാസുകളെക്കുറിച്ചും (Smart Glass) അൺപാക്ക്ഡ് ഇവന്റിൽ സാംസം​ഗ് പ്രഖ്യാപിക്കുമെന്ന് കരുതപ്പെടുന്നു. വാർബി പാർക്കർ, ജെന്റിൽ മോൺസ്റ്റർ തുടങ്ങിയ ഫാഷൻ ബ്രാൻഡുകളുമായി സഹകരിച്ച് വെയറബിൾ ഉപകരണങ്ങൾ വികസിപ്പിക്കാൻ പദ്ധതിയുണ്ടെന്ന് കമ്പനി ഇതിനകം സ്ഥിരീകരിച്ചിട്ടുണ്ട്. 

ഇന്ന് ലണ്ടനിൽ ഉച്ചയ്ക്ക് 2 മണിക്കാണ് ഗാലക്സി അൺപാക്ക്ഡ് ഇവന്റ് നടക്കുന്നത്. ഇന്ത്യൻ സമയം വൈകിട്ട് 6.30 മുതൽ സാംസം​ഗ് ഡോട്ട് കോം (samsung.com), സാംസം​ഗ് ന്യൂസ് റൂം (samsung news room), കമ്പനിയുടെ ഔദ്യോഗിക യൂട്യൂബ് ചാനൽ എന്നിവയിലൂടെ പരിപാടി തത്സമയം കാണാൻ കഴിയും. എന്തായാലും സാംസംഗ് കാത്തുവച്ചിരിക്കുന്ന അത്ഭുതങ്ങളുടെ ചുരുളഴിയാൻ ഇനി മണിക്കൂറുകളുടെ കാത്തിരിപ്പ് മാത്രം.