കോഴിക്കോട്: സംസ്ഥാന സ്‌കൂള്‍ കായികമേളയിലെ ഭക്ഷണത്തില്‍ പുഴുവുണ്ടെന്ന സംശയത്തില്‍ വീഡിയോ പകര്‍ത്തിയ അധ്യാപകന്‍ അറസ്റ്റില്‍. എറണാകുളം വെസ്റ്റ് വെങ്ങോല ശാലേം സ്‌കൂളിലെ അധ്യാപകന്‍ ജിജോ ജെയിംസ് (35) ആണ് അറസ്റ്റിലായത്. ബുധനാഴ്ച വൈകീട്ടായിരുന്നു സംഭവം.
കായികമേള നടക്കുന്ന സ്ഥലത്തുണ്ടായ സംഘര്‍ഷാവസ്ഥ ഒഴിവാക്കാനായി അധ്യാപകനെ ഇന്നലെ തന്നെ പൊലീസ് കരുതല്‍ തടങ്കലില്‍ പാര്‍പ്പിച്ചിരുന്നു. തുടര്‍ന്ന് ഇന്ന് രാവിലെയോടെയാണ് കുന്ദമംഗലം പൊലീസ് അറസ്റ്റ് രേഖപ്പെടുത്തിയത്. ഇയാള്‍ക്കെതിരെ കൂടുതല്‍ വകുപ്പുകള്‍ ചുമത്തിയേക്കുമെന്നാണ് വിവരം.
സാമ്പാറില്‍ പുഴുവുണ്ടെന്ന സംശയത്തില്‍ വീഡിയോ എടുത്തത് സംഘാടകരുടെ ശ്രദ്ധയില്‍പ്പെട്ടതോടെ വാക്കേറ്റവും പിന്നീട് കൈയ്യാങ്കളിയുമായി മാറി. തുടര്‍ന്ന് പൊലീസെത്തി അധ്യാപകനെ കസ്റ്റഡിയിലെടുക്കുകയായിരുന്നു. മേളയുടെ ശോഭ കെടുത്താന്‍ മനഃപൂര്‍വം ശ്രമിച്ചെന്ന സംഘാടകരുടെ പരാതിയുടെ അടിസ്ഥാനത്തിലാണ് നടപടി. മേളയുടെ ആദ്യദിനത്തിലും പ്രഭാതഭക്ഷണത്തില്‍ നിന്ന് പുഴുവിനെ ലഭിച്ചതായി വിവാദമുണ്ടായിരുന്നു.
രാഷ്ട്രീയ വിരോധവും മറ്റ് താത്പര്യങ്ങളും വെച്ച് കായികമേളകളെ അലങ്കോലപ്പെടുത്താന്‍ ശ്രമിക്കുന്നത് വിദ്യാര്‍ത്ഥി സമൂഹത്തോടുള്ള കടുത്ത അപരാധമാണെന്ന് വിദ്യാഭ്യാസ മന്ത്രി വ്യക്തമാക്കി. കഴിഞ്ഞ ദിവസത്തെയും ഇന്നത്തെയും സംഭവങ്ങള്‍ കരുതിക്കൂട്ടി ഉണ്ടാക്കിയ നാടകമാണെന്നും, ഒരു കായികാധ്യാപകനും രണ്ട് മാധ്യമപ്രവര്‍ത്തകരും ചേര്‍ന്ന് തയ്യാറാക്കിയ തിരക്കഥയാണിതെന്നും മന്ത്രി കുറ്റപ്പെടുത്തി. സംഭവത്തിലെ ഗൂഢാലോചനയെക്കുറിച്ച് അന്വേഷണം നടത്തി കര്‍ശന നടപടി സ്വീകരിക്കുമെന്നും അദ്ദേഹം കൂട്ടിച്ചേര്‍ത്തു.
കായികമേളയിലെ പുഴു വിവാദം: വീഡിയോ എടുത്ത അധ്യാപകന്‍ അറസ്റ്റില്‍, ഗൂഢാലോചന അന്വേഷിക്കും
Jaihind TV News Report
Jaihind TV Web Desk
2 min read
412 reads
