റോഡ് സേഫ്റ്റി മിഷൻ ബ്രാൻഡ് അംബാസഡറായി മമ്മൂട്ടിയും ചെയർമാനായി മുഖ്യമന്ത്രി വി ഡി സതീശനും

സംസ്ഥാനത്തെ റോഡപകട മരണങ്ങൾ കുറയ്ക്കാൻ രൂപീകരിച്ച കേരള സ്റ്റേറ്റ് റോഡ് സേഫ്റ്റി മിഷന്റെ ബ്രാൻഡ് അംബാസഡറായി പ്രശസ്ത ചലച്ചിത്ര താരം മമ്മൂട്ടിയെ നിശ്ചയിച്ചു. റോഡ് സേഫ്റ്റി മിഷന്റെ ഔദ്യോഗിക പ്രഖ്യാപനം നവംബർ 15-ന് രാവിലെ 11-ന് എറണാകുളം ടൗൺഹാളിൽ നടക്കുമെന്ന് ഗതാഗത മന്ത്രി സി.പി. ജോൺ അറിയിച്ചു.

സംസ്ഥാനത്ത് ഒരുവർഷം ഏകദേശം 3,700-ഓളം പേരാണ് റോഡ് അപകടങ്ങളിൽ മരിക്കുന്നത്. ഇത് മുൻനിർത്തി 'എൻലൈറ്റൻ ആൻഡ് എൻഫോഴ്‌സ്' (Enlighten and Enforce) എന്ന ആശയവുമായി വിദ്യാർത്ഥികൾ മുതൽ മുതിർന്ന പൗരന്മാർ വരെ ഉൾപ്പെടുന്ന വിപുലമായ ബോധവത്കരണ പരിപാടികളാണ് മിഷൻ ലക്ഷ്യമിടുന്നത്.

മുഖ്യമന്ത്രി വി.ഡി. സതീശൻ ചെയർമാനും ഗതാഗത മന്ത്രി കോ-ചെയർമാനുമായ ഈ മിഷനിൽ എട്ട് വിവിധ വകുപ്പുകളിലെ മന്ത്രിമാർ അംഗങ്ങളായിരിക്കും. ജില്ലാതലത്തിലും തദ്ദേശസ്വയംഭരണ സ്ഥാപനതലത്തിലും പ്രവർത്തനം വ്യാപിപ്പിച്ച് സുരക്ഷിത ഡ്രൈവിങ് ക്ലബുകൾ രൂപീകരിക്കാനും പദ്ധതിയുണ്ട്.

റോഡുകളുടെ നവീകരണം, ബ്ലാക്ക് സ്പോട്ടുകൾ പരിഹരിക്കൽ, സൈൻ ബോർഡുകളുടെ അറ്റകുറ്റപ്പണി, സീബ്രാ ലൈനുകളുടെ വീതി കൂട്ടൽ, റോഡ് മാർക്കിങ്ങിൽ കളർ കോഡുകൾ ഉൾപ്പെടുത്തി സുരക്ഷാ മേഖലകൾ സജ്ജമാക്കൽ എന്നിവയും ഇതിന്റെ ഭാഗമായി നടപ്പിലാക്കും. കൂടാതെ, സ്‌കൂൾ പാഠ്യപദ്ധതിയിൽ റോഡ് സുരക്ഷ ഉൾപ്പെടുത്തുന്നതിനും പദ്ധതിക്കായി പ്രത്യേക മൊബൈൽ ആപ്പുകൾ വികസിപ്പിക്കുന്നതിനും നടപടിയുണ്ടാകും.