പ്രഭാസ് നായകനായ നാഗ് അശ്വിൻ ചിത്രം 'കൽക്കി 2898 എഡി'യ്ക്ക് 72-ാം ദേശീയ ചലച്ചിത്ര പുരസ്‌കാരത്തിൽ ഇരട്ട നേട്ടം. മികച്ച ജനപ്രിയ ചിത്രത്തിനുള്ള ദേശീയ പുരസ്‌കാരവും മികച്ച പ്രൊഡക്ഷൻ ഡിസൈനർക്കുള്ള പുരസ്‌കാരവുമാണ് സയൻസ് ഫിക്ഷൻ ബ്ലോക്ക്ബസ്റ്റർ സ്വന്തമാക്കിയത്.
വൈജയന്തി മൂവീസ് നിർമ്മിച്ച ചിത്രം ആഗോളതലത്തിൽ വൻ വിജയമാണ് നേടിയത്. ബോക്സ് ഓഫീസിൽ 1200 കോടിയിലധികം രൂപയുടെ ആഗോള ഗ്രോസ് കളക്ഷൻ സ്വന്തമാക്കിയ 'കൽക്കി 2898 എഡി', 2024ലെ ഏറ്റവും കൂടുതൽ കളക്ഷൻ നേടിയ ഇന്ത്യൻ ചിത്രങ്ങളിലൊന്നായി മാറിയിരുന്നു. ഹിന്ദി വിപണിയിൽ മാത്രം ചിത്രം 300 കോടിയിലധികം രൂപയുടെ കളക്ഷൻ നേടിയിരുന്നു.
പ്രൊഡക്ഷൻ ഡിസൈനിന് നിതിൻ സിഹാനി ചൗധരിക്ക് പുരസ്‌കാരം
ചിത്രത്തിന്റെ ഭാവനാപൂർണമായ ലോകം ഒരുക്കിയ പ്രൊഡക്ഷൻ ഡിസൈനിന് നിതിൻ സിഹാനി ചൗധരിക്കാണ് ദേശീയ പുരസ്‌കാരം ലഭിച്ചത്. പുരസ്‌കാര നേട്ടത്തിന് പ്രേക്ഷകർക്കും ജൂറി അംഗങ്ങൾക്കും നന്ദി അറിയിച്ച വൈജയന്തി മൂവീസ്, 'കൽക്കി'യുടെ രണ്ടാം ഭാഗത്തിലൂടെ ഈ ദൃശ്യലോകം കൂടുതൽ വലുതായി അവതരിപ്പിക്കാനുള്ള ശ്രമത്തിലാണെന്നും വ്യക്തമാക്കി.
ഭാവിയും പുരാണവും കോർത്തിണക്കിയ ദൃശ്യവിസ്മയം
സംഘർഷങ്ങളും കാലാവസ്ഥാ ദുരന്തങ്ങളും മൂലം തകർന്ന ഒരു ഡിസ്റ്റോപിയൻ ലോകത്തിന്റെ പശ്ചാത്തലത്തിലാണ് 'കൽക്കി 2898 എഡി'യുടെ കഥ പുരോഗമിക്കുന്നത്. പ്രവചനങ്ങൾക്കും പുരാതന രഹസ്യങ്ങൾക്കുമിടയിൽ സ്വന്തം വിധിയുമായി പോരാടുന്ന യോദ്ധാവായ ഭൈരവയുടെ (പ്രഭാസ്) യാത്രയാണ് ചിത്രം അവതരിപ്പിക്കുന്നത്.
ഇന്ത്യൻ ഇതിഹാസമായ മഹാഭാരതത്തിലെ അശ്വത്ഥാമാവായി അമിതാഭ് ബച്ചൻ എത്തിയതിലൂടെ പുരാണവും ഭാവികാല സങ്കൽപ്പങ്ങളും സമന്വയിപ്പിച്ച വേറിട്ടൊരു ആഖ്യാനമാണ് ചിത്രം ഒരുക്കിയത്. ചിത്രത്തിൽ ദീപിക പദുക്കോൺ കൽക്കി അവതാരത്തെ ഗർഭത്തിൽ വഹിക്കുന്ന സുമതിയായും, കമൽ ഹാസൻ കൽക്കിയെ നേരിടാൻ ഒരുങ്ങുന്ന വില്ലൻ കഥാപാത്രമായ സുപ്രീം യാസ്കിനായും എത്തി.
നാഗ് അശ്വിൻ സംവിധാനം ചെയ്ത ചിത്രം ഇന്ത്യൻ സിനിമയിലെ ഏറ്റവും വലിയ ദൃശ്യപരീക്ഷണങ്ങളിൽ ഒന്നായി വിലയിരുത്തപ്പെട്ടിരുന്നു. ദേശീയ പുരസ്‌കാര നേട്ടത്തോടെ 'കൽക്കി 2898 എഡി'യുടെ തിളക്കം കൂടുതൽ ഉയർന്നിരിക്കുകയാണ്.
