പ്രമുഖ ജാപ്പനീസ് വാഹന നിർമാതാക്കളായ ഹോണ്ടയുടെ ആദ്യ ഇലക്ട്രിക് എസ്‌യുവി ഡിസംബർ 2-ന് ഇന്ത്യൻ വിപണിയിൽ അവതരിപ്പിക്കും. അടുത്ത വർഷം ആദ്യം വിപണിയിലെത്തുമെന്നായിരുന്നു നേരത്തെയുള്ള റിപ്പോർട്ടുകളെങ്കിലും, ഈ വർഷാവസാനത്തോടെ തന്നെ വാഹനം പുറത്തിറക്കാനാണ് കമ്പനിയുടെ തീരുമാനം. ‘സീറോ ആൽഫ’ എന്ന ആശയമാതൃകയിൽ നിന്ന് വികസിപ്പിച്ചെടുത്ത ഈ വാഹനം പുതിയൊരു പേരിലായിരിക്കും വിപണിയിലെത്തുക.
ആഭ്യന്തര വിപണിയിലെ വിൽപ്പനയ്ക്കും വിദേശ രാജ്യങ്ങളിലേക്കുള്ള കയറ്റുമതിക്കുമായി എസ്‌യുവി ഇന്ത്യയിൽ തന്നെ നിർമിക്കാനാണ് ഹോണ്ടയുടെ പദ്ധതി. ഇതിന്റെ ഭാഗമായി ഹൈവേകൾ, നഗര റോഡുകൾ, വെല്ലുവിളി നിറഞ്ഞ ഭൂപ്രദേശങ്ങൾ എന്നിവിടങ്ങളിൽ വാഹനം ഇതിനകം പരീക്ഷണ ഓട്ടം പൂർത്തിയാക്കിയിട്ടുണ്ട്. യാത്രാസുഖം, കാര്യക്ഷമത, വിശ്വാസ്യത എന്നിവ വിലയിരുത്തുന്നതിനായിരുന്നു ഈ പരീക്ഷണങ്ങൾ. ഹോണ്ട സീറോ സീരീസിലെ ‘തിൻ, ലൈറ്റ്, വൈസ്’ എന്ന ആശയത്തെ അടിസ്ഥാനമാക്കിയാണ് വാഹനം നിർമിക്കുന്നത്. 65 kWh, 75 kWh എന്നിങ്ങനെ രണ്ട് ബാറ്ററി പാക്ക് ഓപ്ഷനുകളും ഫ്രണ്ട് വീൽ ഡ്രൈവ് സംവിധാനമുള്ള സിംഗിൾ മോട്ടോർ പതിപ്പും വാഹനത്തിന് ലഭിച്ചേക്കുമെന്നാണ് റിപ്പോർട്ടുകൾ.
ആഗോള വിപണിയിലെ നിക്ഷേപങ്ങൾ പുനഃപരിശോധിക്കുന്നതിനിടയിൽ ഇന്ത്യയെ തന്ത്രപ്രധാന കേന്ദ്രമായി ഉപയോഗിച്ച് രാജ്യത്തെ വിപണി സാന്നിധ്യം ശക്തമാക്കാനാണ് കമ്പനി ലക്ഷ്യമിടുന്നത്. മാരുതി സുസുക്കി ഇ-വിറ്റാര, ടൊയോട്ടയുടെ സമാന മോഡൽ, ടാറ്റ സിയറ ഇവി, മഹീന്ദ്ര BE 6 തുടങ്ങിയ പ്രമുഖ വാഹനങ്ങളുമായാകും ഹോണ്ടയുടെ പുതിയ ഇലക്ട്രിക് എസ്‌യുവി വിപണിയിൽ മത്സരിക്കുക.
ഹോണ്ടയുടെ ആദ്യ ഇലക്ട്രിക് എസ്‌യുവി ഡിസംബർ 2-ന് ഇന്ത്യയിലെത്തുന്നു
Jaihind TV News Report
Jaihind TV Web Desk
2 min read
605 reads
