അമിതമായ മാനസിക സമ്മർദ്ദം ക്യാൻസറിന് കാരണമാകുമോ? യഥാർത്ഥ വസ്‌തുത അറിയാം!

ഇന്നത്തെ അതിവേഗ ജീവിതത്തിൽ മാനസിക സമ്മർദ്ദം (Stress) എല്ലാവരുടെയും ജീവിതത്തിന്റെ ഒരു ഭാഗമായി മാറിയിരിക്കുകയാണ്. ജോലിസ്ഥലത്തെ കടുത്ത സമ്മർദ്ദം മുതൽ വ്യക്തിപരമായ ഉത്തരവാദിത്തങ്ങൾ വരെ എല്ലാവരെയും പലവിധത്തിൽ ബാധിക്കുന്നു. ഇത് ഭാവിയിൽ ക്യാൻസർ പോലുള്ള മാരക രോഗങ്ങൾക്ക് കാരണമാകുമോ എന്ന ചോദ്യം പലരിലും വലിയ ആശയക്കുഴപ്പവും ആശങ്കയും ഉണ്ടാക്കുന്ന ഒന്നാണ്. എന്താണ് ഇതിന് പിന്നിലെ ശാസ്ത്രീയ വശം എന്ന് നോക്കാം.

ക്യാൻസർ എന്നത് അടിസ്ഥാനപരമായി ഒരു ജനിതക രോഗമാണ് (Genetic Disease). നമ്മുടെ കോശങ്ങളിലെ ഡിഎൻഎ (DNA) ഘടനയിലുണ്ടാകുന്ന വ്യതിയാനങ്ങൾ കോശങ്ങളുടെ അനിയന്ത്രിതമായ വളർച്ചയ്ക്ക് കാരണമാകുമ്പോഴാണ് ക്യാൻസർ ഉണ്ടാകുന്നത്. ഇത്തരം ജനിതക വ്യതിയാനങ്ങൾക്ക് കാരണമാകുന്ന പ്രധാന ഘടകങ്ങൾ ഇവയാണ്:

• പുകയിലയുടെയും ലഹരിവസ്തുക്കളുടെയും ഉപയോഗം.
• ചില തരം അണുബാധകൾ.
• പരിസ്ഥിതിയിലെ ക്യാൻസർ രോഗകാരികളായ വിഷാംശങ്ങൾ.
• പാരമ്പര്യമായി ലഭിക്കുന്ന ജീനുകൾ.

വിട്ടുമാറാത്ത മാനസിക സമ്മർദ്ദമുണ്ടാകുമ്പോൾ ശരീരം എപ്പോഴും ഒരു 'ഫൈറ്റ്-ഓർ-ഫ്ലൈറ്റ്' (Fight-or-Flight) അവസ്ഥയിലായിരിക്കും. ഇത് ശരീരത്തിൽ ചില മാറ്റങ്ങളുണ്ടാക്കുന്നു.കോർട്ടിസോൾ (Cortisol), അഡ്രിനാലിൻ (Adrenaline) തുടങ്ങിയ ഹോർമോണുകൾ ശരീരത്തിൽ തുടർച്ചയായി ഉത്പാദിപ്പിക്കപ്പെടുന്നു. ഇത്തരത്തിൽ ഹോർമോണുകൾ ദീർഘകാലം നിലനിൽക്കുന്നത് ശരീരത്തിന്റെ സ്വാഭാവിക പ്രക്രിയകളെ തടസ്സപ്പെടുത്തും.കൂടാതെ വിട്ടുമാറാത്ത മാനസിക സമ്മർദ്ദം രോഗപ്രതിരോധ ശേഷി കുറയ്ക്കുകയും, കേടുപാടുകൾ സംഭവിച്ച കോശങ്ങളെ പുനരുജ്ജീവിപ്പിക്കാനുള്ള ശരീരത്തിന്റെ ശേഷിയെ തകരാറിലാക്കുകയും ചെയ്യുന്നു.

എന്നാൽ സമ്മർദ്ദം നേരിട്ട് ക്യാൻസറിലേക്ക് നയിക്കുന്നില്ലെങ്കിലും, സമ്മർദ്ദം മൂലം മനുഷ്യർ തിരഞ്ഞെടുക്കുന്ന മോശം ജീവിതശൈലി ക്യാൻസർ സാധ്യത വർദ്ധിപ്പിക്കുന്നുണ്ട്. ദീർഘകാലം സമ്മർദ്ദത്തിലൂടെ കടന്നുപോകുന്ന ആളുകൾ പലപ്പോഴും താഴെ പറയുന്ന ആരോഗ്യകരമല്ലാത്ത ശീലങ്ങളിലേക്ക് തിരിയാറുണ്ട്:

1. അമിത ഭക്ഷണം അല്ലെങ്കിൽ ജങ്ക് ഫുഡുകളുടെ ഉപയോഗം.
2. വ്യായാമമില്ലായ്മയും ഉദാസീനമായ ജീവിതശൈലിയും.
3. പുകവലി, മദ്യപാനം തുടങ്ങിയ ലഹരിവസ്തുക്കളുടെ ഉപയോഗം.
4. കൃത്യമായ ആരോഗ്യപരിശോധനകൾ നടത്താതിരിക്കൽ.

ജീവിതത്തിൽ നിന്ന് മാനസിക സമ്മർദ്ദം പൂർണ്ണമായും ഒഴിവാക്കുക എന്നത് പ്രായോഗികമല്ല. എന്നാൽ അത് വിട്ടുമാറാത്ത ഒരു രോഗമായി മാറി നമ്മളെ കീഴടക്കാതെ നോക്കുക എന്നതാണ് പ്രധാനം. മാനസികവും ശാരീരികവുമായ ആരോഗ്യം ഗണ്യമായി മെച്ചപ്പെടുത്താൻ താഴെ പറയുന്ന കാര്യങ്ങൾ ശീലമാക്കാം:

• കൃത്യമായ വ്യായാമം: ദിവസവും കുറച്ചു സമയം വ്യായാമത്തിനായി മാറ്റിവെക്കുക.
• സമീകൃതാഹാരം: ആരോഗ്യപ്രദമായ ഭക്ഷണരീതി പിന്തുടരുക.
• ആവശ്യത്തിന് ഉറക്കം: കൃത്യമായ ഉറക്കം ശരീരത്തിന് വിശ്രമം നൽകും.
• ധ്യാനവും മാനസിക പിന്തുണയും: യോഗ, ധ്യാനം എന്നിവയിലൂടെ മനസ്സിനെ ശാന്തമാക്കുക.

സമ്മർദ്ദം ക്യാൻസറിന് കാരണമാകുമോ എന്ന് ഭയപ്പെടുന്നതിന് പകരം, അത് നമ്മുടെ മൊത്തത്തിലുള്ള ആരോഗ്യത്തെ ബാധിക്കാത്ത രീതിയിൽ കൃത്യസമയത്ത് നിയന്ത്രിക്കാൻ പഠിക്കുകയാണ് വേണ്ടത്.