മുന്‍ ആരോഗ്യമന്ത്രി വീണാ ജോര്‍ജിനെതിരെ കരിങ്കൊടി പ്രതിഷേധം നടത്തിയ കെഎസ്യു പ്രവര്‍ത്തകരെ കള്ളക്കേസില്‍ കുടുക്കി ജയിലിലടച്ച സംഭവം കേരള രാഷ്ട്രീയത്തിലെ ഏറ്റവും വലിയ അധികാരദുര്‍വിനിയോഗങ്ങളിലൊന്നായി മാറിയിരിക്കുകയാണ്. പ്രക്ഷോഭങ്ങളെ അടിച്ചമര്‍ത്താനും വിദ്യാര്‍ത്ഥി നേതാക്കളുടെ മനോവീര്യം തകര്‍ക്കാനും പിണറായി സര്‍ക്കാര്‍ ഏത് കുടിലതന്ത്രവും പ്രയോഗിക്കുമെന്നതിന്റെ ഏറ്റവും ഒടുവിലത്തെ തെളിവാണ് ഇപ്പോള്‍ പുറത്തുവന്നിരിക്കുന്ന വിവരങ്ങള്‍. സമാധാനപരമായ പ്രതിഷേധത്തെ വധശ്രമമാക്കി മാറ്റാന്‍ പോലീസ് സംവിധാനത്തെ എങ്ങനെ ദുരുപയോഗം ചെയ്തു എന്നതിന്റെ നേര്‍ക്കാഴ്ചയാണ് ഈ കേസ്.
മുന്‍ ആരോഗ്യമന്ത്രിയുടെ ഗണ്‍മാന്‍ അഭിലാഷ് പ്രത്യേക അന്വേഷണ സംഘത്തിന് (SIT) മുന്നില്‍ നല്‍കിയ പുതിയ മൊഴി കെഎസ്യു ഉയര്‍ത്തിയ വാദങ്ങളുടെ സമ്പൂര്‍ണ്ണ വിജയത്തെയാണ് സാക്ഷ്യപ്പെടുത്തുന്നത്. കെഎസ്യു പ്രവര്‍ത്തകര്‍ ആയുധമുപയോഗിച്ച് ആക്രമിക്കാന്‍ ശ്രമിച്ചുവെന്ന് താന്‍ മൊഴി നല്‍കിയത് വീണാ ജോര്‍ജിന്റെ നേരിട്ടുള്ള നിര്‍ദ്ദേശപ്രകാരമാണെന്നാണ് അഭിലാഷ് വ്യക്തമാക്കിയിരിക്കുന്നത്. സംഭവ ദിവസം അത്തരത്തിലുള്ള യാതൊരു കയ്യേറ്റമോ വധശ്രമമോ നടന്നിട്ടില്ലെന്നും, മന്ത്രിയുടെ താല്‍പ്പര്യപ്രകാരമാണ് റെയില്‍വേ പോലീസിന് വ്യാജമൊഴി നല്‍കേണ്ടി വന്നതെന്നും ഗണ്‍മാന്‍ സമ്മതിച്ചിരിക്കുകയാണ്.
വെറുമൊരു കരിങ്കൊടി പ്രതിഷേധത്തിന്റെ പേരില്‍ കെഎസ്യു പ്രവര്‍ത്തകരെ 16 ദിവസത്തോളം റിമാന്‍ഡില്‍ ഇരുത്തിയത് ഗുരുതരമായ മനുഷ്യാവകാശ ലംഘനമാണ്. വ്യാജ പരാതിയുടെ അടിസ്ഥാനത്തില്‍ നിരപരാധികളായ വിദ്യാര്‍ത്ഥികളെ രണ്ട് ആഴ്ചയിലേറെ ജയിലിലിട്ട പിണറായി പൊലീസിന്റെ നടപടി നീതിയുടെ കശാപ്പാണ്. രാഷ്ട്രീയ താല്‍പ്പര്യങ്ങള്‍ക്ക് വേണ്ടി നിയമപാലകരെ ഉപയോഗിച്ച് കൃത്രിമമായി വധശ്രമ വകുപ്പുകള്‍ ചുമത്തിയത് ആരുടെയൊക്കെ അറിവോടെയാണെന്ന് സമഗ്രമായി അന്വേഷിക്കേണ്ടതുണ്ട്.
ആദ്യം മുതല്‍ തന്നെ തങ്ങള്‍ നടത്തിയത് ജനാധിപത്യപരമായ പ്രതിഷേധം മാത്രമാണെന്നും, വധശ്രമം ആരോപിക്കുന്നത് വ്യാജമാണെന്നുമുള്ള കെഎസ്യുവിന്റെ നിലപാടാണ് ഇപ്പോള്‍ അര്‍ത്ഥശങ്കക്കിടയില്ലാത്തവിധം തെളിയിക്കപ്പെട്ടിരിക്കുന്നത്. കേസില്‍ ഗൂഢാലോചന നടത്തിയ മുന്‍ മന്ത്രിക്കും അതിന് കൂട്ടുനിന്ന ഉദ്യോഗസ്ഥര്‍ക്കും എതിരെ കടുത്ത നിയമനടപടികള്‍ സ്വീകരിക്കണമെന്ന ആവശ്യം ഇപ്പോള്‍ ശക്തമായിരിക്കുകയാണ്. വ്യാജ കേസുകളിലൂടെ വിദ്യാര്‍ത്ഥി പ്രസ്ഥാനങ്ങളെ തളര്‍ത്താമെന്ന വ്യാമോഹം ഭരണകൂടത്തിന് തിരിച്ചടിയാകുന്ന ചരിത്രമാണ് ഈ സംഭവത്തിലൂടെ വീണ്ടും ആവര്‍ത്തിക്കപ്പെടുന്നത്.
വ്യാജ പരാതിയില്‍ കെ.എസ്.യു പ്രവര്‍ത്തകര്‍ക്ക് 16 ദിവസത്തെ ജയില്‍വാസം: സിപിഎം പ്രതിരോധത്തിലാകുമ്പോള്‍ മനുഷ്യാവകാശ ലംഘനത്തിന് ആര് മറുപടി പറയും?
Jaihind TV News Report
Jaihind TV Web Desk
3 min read
163 reads
