തിരുവനന്തപുരം: സംസ്ഥാനത്തെ വൈദ്യുതി പ്രതിസന്ധി പരിഹരിക്കാൻ അടിയന്തര നീക്കങ്ങളുമായി കെഎസ്ഇബി. യൂണിറ്റിന് 30 രൂപ നിരക്കിൽ ഈ മാസം 30 വരെ പുറത്തുനിന്ന് വൈദ്യുതി വാങ്ങാനാണ് ബോർഡിന്റെ നീക്കം. ഇതിന് അനുമതി തേടി കെഎസ്ഇബി ഇന്ന് സർക്കാരിന് കത്ത് നൽകും.
വൈദ്യുതി പ്രതിസന്ധിയിൽ മുഖ്യമന്ത്രി നേരിട്ട് ഇടപെട്ടിട്ടുണ്ട്. വൈദ്യുതി മേഖലയിലെ വിദഗ്ധരുമായി മുഖ്യമന്ത്രി ചർച്ച നടത്തി. വൈദ്യുതി റെഗുലേറ്ററി കമ്മീഷൻ മുൻ ചെയർമാന്മാരുമായും കൂടിക്കാഴ്ച നടത്തി. സംസ്ഥാനത്തിന് ആവശ്യമായ വൈദ്യുതി ലഭ്യമാക്കുന്നതിനായി ചീഫ് സെക്രട്ടറിയും ധനകാര്യ അഡീഷണൽ ചീഫ് സെക്രട്ടറിയും മറ്റ് സംസ്ഥാനങ്ങളുമായി ബന്ധപ്പെട്ടു.
ഉയർന്ന നിരക്കിൽ പുറത്തുനിന്ന് വൈദ്യുതി വാങ്ങാൻ അനുമതി നൽകണമെന്നാണ് കെഎസ്ഇബി സർക്കാരിനോട് ആവശ്യപ്പെടുക. ഇതിനൊപ്പം വൈദ്യുതി വാങ്ങുന്നതിനാവശ്യമായ സാമ്പത്തിക പിന്തുണ നൽകണമെന്നും കത്തിൽ ആവശ്യപ്പെടും.
സർക്കാരിന്റെ അനുമതി ലഭിച്ച ശേഷമായിരിക്കും പുതിയ വൈദ്യുതി വാങ്ങൽ കരാറുകളുമായി റെഗുലേറ്ററി കമ്മീഷനെ സമീപിക്കുക. നിലവിലെ ചട്ടപ്രകാരം യൂണിറ്റിന് 10 രൂപയ്ക്ക് മുകളിൽ വൈദ്യുതി വാങ്ങുന്നതിന് നിയന്ത്രണമുണ്ട്. എന്നാൽ, എൻടിപിസിയിൽ നിന്ന് യൂണിറ്റിന് 30 രൂപ നിരക്കിൽ വൈദ്യുതി വാങ്ങാനുള്ള ധാരണയാണ് നിലവിലുള്ളത്. ഇക്കാര്യത്തിൽ സർക്കാരിനെ കൂടി വിശ്വാസത്തിലെടുത്താകും കെഎസ്ഇബി മുന്നോട്ടുപോകുക.
പ്രതിസന്ധിക്ക് ബദൽ മാർഗങ്ങൾ തേടി കെഎസ്ഇബി ഡയറക്ടർ ബോർഡ് അംഗങ്ങൾ ഉത്തരേന്ത്യയിലെ വൈദ്യുതി മിച്ച സംസ്ഥാനങ്ങളിലേക്ക് തിരിക്കും. സിസ്റ്റം ഓപ്പറേഷൻസ് ഡയറക്ടർ പി. ശിവദാസും ഫിനാൻസ് ഡയറക്ടർ ആർ. ബിജുവുമാണ് ചർച്ചകൾക്കായി പോകുന്നത്.
വിവിധ സ്വകാര്യ വൈദ്യുതി കമ്പനികളുമായും സംഘം ചർച്ച നടത്തും. എൻടിപിസി ആസ്ഥാനവും സന്ദർശിക്കും. സംസ്ഥാനത്തിന്റെ അടിയന്തര വൈദ്യുതി ആവശ്യകത നിറവേറ്റുന്നതിനായി ലഭ്യമായ എല്ലാ സാധ്യതകളും പരിശോധിക്കാനാണ് കെഎസ്ഇബിയുടെ നീക്കം.
