ഇന്ത്യയ്ക്ക് തിരിച്ചടി; ഹാർദിക് പാണ്ഡ്യയുടെയും ഹർഷിത് റാണയുടെയും തിരിച്ചുവരവ് വൈകും

ഹാർദിക് പാണ്ഡ്യയുടെയും ഹർഷിത് റാണയുടെയും തിരിച്ചുവരവ് വൈകും; ന്യൂസിലാൻഡ് പര്യടനം സംശയത്തിൽബെംഗളൂരു: ഇന്ത്യൻ ക്രിക്കറ്റ് ആരാധകർക്ക് നിരാശ സമ്മാനിച്ച് ഓൾറൗണ്ടർമാരായ ഹാർദിക് പാണ്ഡ്യയുടെയും ഹർഷിത് റാണയുടെയും കളിക്കളത്തിലേക്കുള്ള തിരിച്ചുവരവ് വീണ്ടും വൈകുമെന്ന് റിപ്പോർട്ട്. പരിക്കിനെ തുടർന്ന് ബെംഗളൂരുവിലെ ബി.സി.സി.ഐ (BCCI) സെന്റർ ഓഫ് എക്സലൻസിൽ തീവ്ര പരിചരണത്തിൽ കഴിയുന്ന ഇരുവർക്കും വരാനിരിക്കുന്ന ന്യൂസിലാൻഡ് പര്യടനത്തിലും കളിക്കാനാകില്ലെന്നാണ് സൂചന. 

2026 ഐ.പി.എല്ലിന് ശേഷമാണ് ഹാർദിക് കളിക്കളത്തിൽ നിന്ന് വിട്ടുനിൽക്കുന്നത്. ബാറ്റിങ്, ബോളിങ്, ഫീൽഡിങ് പരിശീലനങ്ങൾ പൂർത്തിയാക്കി തിരിച്ചുവരവിന് ഒരുങ്ങവേ മാച്ച് സിമുലേഷനിടെ വലതു കാൽക്കണ്ടത്തിൽ വീണ്ടും വേദന അനുഭവപ്പെടുകയായിരുന്നു. എം.ആർ.ഐ (MRI) സ്കാനിങ്ങിന് ശേഷം താരത്തിന് എട്ടാഴ്ചത്തെ വിശ്രമവും വിറ്റാമിൻ ഡി മരുന്നുകളും ബിസ്ഫോസ്ഫോണേറ്റ് തെറാപ്പിയും നിർദ്ദേശിച്ചിട്ടുണ്ട്.

മറുവശത്ത്, ഈ വർഷം ആദ്യം ഇംഗ്ലണ്ടിനെതിരെയുള്ള ട്വന്റി-20 പരമ്പരയിൽ അവസാനമായി കളിച്ച ഹർഷിത് റാണയ്ക്കും പരിശീലനത്തിനിടെ ഇടത് കാലിലെ തുടയിൽ വേദന അനുഭവപ്പെട്ടു. ഇതിനുപുറമെ പനിയും തൊണ്ടവേദനയും ബാധിച്ചതോടെ താരം പൂർണ്ണ സുഖം പ്രാപിച്ച ശേഷമേ പരിശീലനത്തിലേക്ക് മടങ്ങിയെത്തുകയുള്ളൂ. 

ഒക്ടോബർ 22 മുതൽ നവംബർ 15 വരെ അഞ്ച് ട്വന്റി-20 മത്സരങ്ങളും അഞ്ച് ഏകദിനങ്ങളും അടങ്ങിയതാണ് ഇന്ത്യയുടെ ന്യൂസിലാൻഡ് വൈറ്റ് ബോൾ പര്യടനം. തുടർന്ന് നവംബർ 19 മുതൽ വെല്ലിംഗ്ടണിലും നവംബർ 27 മുതൽ ക്രൈസ്റ്റ് ചർച്ചിലും ടെസ്റ്റ് മത്സരങ്ങളും നടക്കും. നിലവിൽ ലോക ടെസ്റ്റ് ചാമ്പ്യൻഷിപ്പ് പോയിന്റ് പട്ടികയിൽ ന്യൂസിലാൻഡ് മൂന്നാം സ്ഥാനത്തും ഇന്ത്യ അഞ്ചാം സ്ഥാനത്തുമാണ്.

അതേസമയം, ഇന്ത്യക്കെതിരായ ട്വന്റി-20 പരമ്പരയ്ക്കുള്ള 16 അംഗ ടീമിനെ മിച്ചൽ സാന്റ്നറുടെ നേതൃത്വത്തിൽ ന്യൂസിലാൻഡ് പ്രഖ്യാപിച്ചിട്ടുണ്ട്.   ന്യൂസിലാൻഡ് ടീം: മിച്ചൽ സാന്റ്നർ (ക്യാപ്റ്റൻ), ഫിൻ അലൻ, മൈക്കൽ ബ്രേസ്‌‌വെൽ, മാർക്ക് ചാപ്മാൻ, ഡെവോൺ കോൺവെ, ജേക്കബ് ഡഫി, ലോക്കി ഫെർഗൂസൻ, സാക്ക് ഫൗൾക്സ്, മാറ്റ് ഹെൻറി, ബെവോൺ ജേക്കബ്‌സ്, കെയ്ൽ ജാമിസൺ, ആദം മിൽനെ, ഡാരിൽ മിച്ചൽ, ഗ്ലെൻ ഫിലിപ്സ്, ടിം സീഫർട്ട്, നഥാൻ സ്മിത്ത്.