അന്താരാഷ്ട്ര ഫുട്ബോളിലെ എക്കാലത്തെയും മികച്ച താരങ്ങളിലൊരാളായ ക്രിസ്റ്റ്യാനോ റൊണാൾഡോ രാജ്യാന്തര ഫുട്ബോളിൽ നിന്ന് വിരമിക്കൽ പ്രഖ്യാപിക്കാൻ ഒരുങ്ങുന്നതായി റിപ്പോർട്ടുകൾ. യുവേഫ നേഷൻസ് ലീഗിൽ സെപ്റ്റംബർ 24-ന് വെയിൽസിനെതിരെ നടക്കുന്ന മത്സരമാകും പോർച്ചുഗൽ കുപ്പായത്തിൽ റൊണാൾഡോയുടെ അവസാന മത്സരമെന്നാണ് ലഭിക്കുന്ന സൂചനകൾ. തൻ്റെ കരിയർ ആരംഭിച്ച സ്പോർട്ടിങ് ലിസ്ബണിൻ്റെ ഹോം ഗ്രൗണ്ടായ 'എസ്താഡിയോ ജോസെ അൽവലാഡെ' സ്റ്റേഡിയത്തിൽ തന്നെയാണ് ഈ വിടവാങ്ങൽ മത്സരത്തിനും കളമൊരുങ്ങുന്നത്. മാധ്യമപ്രവർത്തകനായ മുഹമ്മദ് അവാദ് പോർച്ചുഗീസ് ഏജൻ്റിനെ ഉദ്ധരിച്ചാണ് ഇക്കാര്യം റിപ്പോർട്ട് ചെയ്തത്. എന്നാൽ പോർച്ചുഗീസ് ഫുട്ബോൾ ഫെഡറേഷനോ റൊണാൾഡോയോ ഇതുവരെ ഔദ്യോഗിക സ്ഥിരീകരണം നൽകിയിട്ടില്ല.
41-കാരനായ റൊണാൾഡോ സ്പോർട്ടിങ് സിപിയുടെ അക്കാദമിയിലൂടെയാണ് ഫുട്ബോൾ കരിയറിന് തുടക്കമിട്ടത്. 2003-ൽ മാഞ്ചസ്റ്റർ യുണൈറ്റഡിലേക്ക് ചേക്കേറുന്നതിന് മുൻപ് സ്പോർട്ടിങ്ങിനായി തിളങ്ങിയ താരം, പിന്നീട് രണ്ട് പതിറ്റാണ്ടിലേറെ ലോക ഫുട്ബോളിന്റെ നെറുകയിൽ തിളങ്ങിനിന്നു. തുടക്കം കുറിച്ച സ്വന്തം മൈതാനത്ത് വെച്ച് തന്നെ ഇതിഹാസ കരിയറിന് തിരശ്ശീല വീഴുന്നത് ആരാധകർക്കും ഏറെ വൈകാരിക നിമിഷമായിരിക്കും. 2026-27 നേഷൻസ് ലീഗ് സീസണിൽ പോർച്ചുഗലിൻ്റെ ആദ്യ മത്സരമാണിത്.
രാജ്യാന്തര ഫുട്ബോളിൽ ഏറ്റവും കൂടുതൽ മത്സരങ്ങൾ കളിച്ച താരവും എക്കാലത്തെയും മികച്ച ഗോൾവേട്ടക്കാരനുമാണ് ക്രിസ്റ്റ്യാനോ. പോർച്ചുഗലിനായി കളിച്ച 233 മത്സരങ്ങളിൽ നിന്ന് 146 ഗോളുകൾ താരം അടിച്ചുകൂട്ടിയിട്ടുണ്ട്. 2016-ലെ യൂറോ കപ്പും 2019-ലെ യുവേഫ നേഷൻസ് ലീഗ് കിരീടവുമാണ് ദേശീയ ടീമിനൊപ്പമുള്ള പ്രധാന നേട്ടങ്ങൾ. കഴിഞ്ഞ ലോകകപ്പിന്റെ പ്രീ-ക്വാർട്ടറിൽ സ്പെയിനോട് തോറ്റ് പോർച്ചുഗൽ പുറത്തായതിന് ശേഷം, അത് തൻ്റെ അവസാന ലോകകപ്പായിരിക്കുമെന്ന് റൊണാൾഡോ സ്ഥിരീകരിച്ചിരുന്നുവെങ്കിലും ദേശീയ ടീമിൽ നിന്നുള്ള വിരമിക്കൽ പ്രഖ്യാപിച്ചിരുന്നില്ല. ലോകകപ്പിന് ശേഷം ജോർജ്ജ് ജീസസ് പുതിയ പരിശീലകനായി ചുമതലയേറ്റെങ്കിലും അദ്ദേഹത്തിന് കീഴിൽ തുടർന്ന് കളിക്കുമോ എന്നതിൽ റൊണാൾഡോ പ്രതികരിച്ചിട്ടില്ല.
