സൈന്യത്തിന്റെ ഗൂർഖ റെജിമെന്റിനായി ക്ലാസിക് 350 ഗൂർഖ എഡിഷൻ; റോയൽ എൻഫീൽഡ് ഉടൻ വിപണിയിൽ

ന്യൂഡൽഹി: ഇന്ത്യൻ സൈന്യത്തിന്റെ ഗൂർഖ റെജിമെന്റിനായി സമർപ്പിച്ചിരിക്കുന്ന റോയൽ എൻഫീൽഡ് ക്ലാസിക് 350 ഗൂർഖ എഡിഷൻ ഉടൻ ഇന്ത്യൻ വിപണിയിലെത്തും. ലോഞ്ച് തീയതി സംബന്ധിച്ച് കമ്പനി ഔദ്യോഗിക പ്രഖ്യാപനം നടത്തിയിട്ടില്ലെങ്കിലും മോട്ടോർസൈക്കിൾ ഡീലർഷിപ്പ് യാർഡിലെത്തിയതിന്റെ ചിത്രങ്ങൾ പുറത്തുവന്നിട്ടുണ്ട്.

റെഗുലർ ക്ലാസിക് 350 മോഡലിൽ നിന്ന് ഗൂർഖ എഡിഷനെ വ്യത്യസ്തമാക്കുന്നത് പ്രധാനമായും നിറത്തിലും ഡിസൈനിലുമാണ്. മാറ്റ് ഫിനിഷിലുള്ള മിലിട്ടറി ഗ്രീൻ നിറത്തിലാണ് ബൈക്ക് എത്തുന്നത്. ഗൂർഖ റെജിമെന്റ് ഔദ്യോഗികമായി ഉപയോഗിക്കുന്ന കുക്രിയുടെ ക്രോസ് ചെയ്ത രൂപത്തിലുള്ള ചിഹ്നം ഉൾപ്പെടുത്തിയ ‘ഗൂർഖ എഡിഷൻ’ സ്റ്റിക്കർ സൈഡ് പാനലുകളിൽ നൽകിയിട്ടുണ്ട്. ക്രോം വയർ-സ്‌പോക്ക് റിമ്മുകളാണ് മറ്റൊരു പ്രധാന പ്രത്യേകത.

യന്ത്രപരമായി നിലവിലെ ക്ലാസിക് 350 മോഡലുകൾക്ക് സമാനമായിരിക്കും ഗൂർഖ എഡിഷൻ. ക്ലാസിക് 350യിലെ ജെ-സീരീസ് സിംഗിൾ സിലിണ്ടർ എൻജിൻ സുഗമമായ യാത്രയ്ക്ക് അനുയോജ്യമാണെന്നാണ് കമ്പനിയുടെ അവകാശവാദം. മണിക്കൂറിൽ 60 മുതൽ 90 കിലോമീറ്റർ വരെ വേഗതയിൽ സഞ്ചരിക്കാൻ ആഗ്രഹിക്കുന്നവർക്ക് ക്ലാസിക് 350 മികച്ചൊരു ഓപ്ഷനാണെന്നും കമ്പനി പറയുന്നു.

പുതിയ ഗൂർഖ എഡിഷന്റെ വിലയും കൃത്യമായ ലോഞ്ച് തീയതിയും റോയൽ എൻഫീൽഡ് ഇതുവരെ പുറത്തുവിട്ടിട്ടില്ല.