'വിദ്യാർത്ഥികൾക്കെതിരെ കേസെടുക്കില്ലെന്ന് ഉറപ്പ് വേണം, എന്നാല്‍ മാത്രം നിരാഹാരം അവസാനിപ്പിക്കാം'; വിഡിയോ സന്ദേശവുമായി സോനം വാങ്ചുക്

ന്യൂഡൽഹി: സി.ജെ.പി സമരം ചെയ്ത വിദ്യാർത്ഥികൾക്കെതിരെ ബലപ്രയോഗം നടത്തുന്നതും കേസെടുക്കുന്നതും ഒഴിവാക്കുമെന്ന് സർക്കാരിൽ നിന്ന് ഉറപ്പ് ലഭിച്ചാൽ ഉപവാസം അവസാനിപ്പിക്കാൻ തയ്യാറാണെന്ന് പ്രമുഖ സാമൂഹിക പ്രവർത്തകൻ സോനം വാങ്ചുക്. 25 ദിവസമായി തുടരുന്ന നിരാഹാര സമരത്തിൽ 11 കിലോയോളം ഭാരം കുറഞ്ഞുവെങ്കിലും താൻ ആരോഗ്യവാനാണെന്ന് എക്സിലൂടെ  പങ്കുവെച്ച വീഡിയോ സന്ദേശത്തിൽ അദ്ദേഹം വ്യക്തമാക്കി. ഡൽഹി സഫ്ദർജങ് ആശുപത്രിയിൽ നിന്ന് ഗുരുഗ്രാമിലെ സ്വകാര്യ ആശുപത്രിയിലേക്ക് മാറ്റിയ ശേഷമാണ് അദ്ദേഹത്തിന്റെ പ്രതികരണം.

പോലീസിന്റെ ക്രൂരമായ ലാത്തിച്ചാർജ് ഉണ്ടായിട്ടും പ്രകോപനങ്ങളിൽ വീഴാതെ തികഞ്ഞ ആത്മസംയമനത്തോടെ സമാധാനപരമായി നിലകൊണ്ട വിദ്യാർത്ഥികളെ സോനം വാങ്ചുക് അഭിനന്ദിച്ചു. വിദ്യാർത്ഥികൾക്ക് നേരെ പ്രകോപനപരമായ സമീപനങ്ങൾ ഉണ്ടായിട്ടും അവർ സമാധാനപാത കൈവിട്ടില്ല. വിദ്യാർത്ഥികളെ ഇത്തരത്തിൽ ക്രൂരമായി അടിച്ചമർത്തുന്നത് കണ്ടതുകൊണ്ടാണ് ആശുപത്രിയിലും ഉപവാസം തുടരാൻ തീരുമാനിച്ചതെന്ന് അദ്ദേഹം പറഞ്ഞു.

കേന്ദ്ര ഭരണകക്ഷിയിലെ മന്ത്രിമാർ, രാഷ്ട്രീയ നേതാക്കൾ, 65-ഓളം എം.പിമാർ എന്നിവർ സമരം അവസാനിപ്പിച്ച് രാജ്യസേവനത്തിലേക്ക് മടങ്ങിയെത്തണമെന്ന് നേരിട്ട് അഭ്യർത്ഥിച്ചിട്ടുണ്ട്. രാജ്യസേവനത്തിലേക്ക് മടങ്ങാൻ താനും ആഗ്രഹിക്കുന്നുണ്ടെന്ന് വ്യക്തമാക്കിയ വാങ്ചുക്, എന്നാൽ വിദ്യാർത്ഥികൾക്കെതിരെ ബലപ്രയോഗം നടത്തരുത് എന്ന പ്രധാന ആവശ്യം സർക്കാരിന് മുന്നിൽ വെക്കുകയാണെന്ന് അറിയിച്ചു.

പോലീസിനെയോ ക്രിമിനൽ നീതിന്യായ വ്യവസ്ഥയെയോ ഉപയോഗിച്ച് വിദ്യാർത്ഥികളെ ഉപദ്രവിക്കില്ലെന്നും എഫ്.ഐ.ആറോ മറ്റു നിയമനടപടികളോ സ്വീകരിക്കില്ലെന്നും കേന്ദ്ര സർക്കാർ ഉറപ്പുനൽകിയാൽ ഇന്ന് തന്നെ സമരം അവസാനിപ്പിക്കും. അല്ലാത്തപക്ഷം ഉപവാസം തുടർന്നുപോകാൻ താൻ നിർബന്ധിതനാകുമെന്നും അദ്ദേഹം കൂട്ടിച്ചേർത്തു.

ജൂൺ 28-നാണ് സോനം വാങ്ചുക് നിരാഹാര സമരം ആരംഭിച്ചത്. ആരോഗ്യസ്ഥിതി മോശമാവുകയും കേന്ദ്രത്തിനെതിരെ വിമർശനം ശക്തമാവുകയും ചെയ്തതോടെ ജൂലൈ 18-ന് ഡൽഹി പോലീസ് നാടകീയമായി അദ്ദേഹത്തെ ആശുപത്രിയിലേക്ക് മാറ്റുകയായിരുന്നു.