സൂക്ഷിച്ചാൽ ദുഃഖിക്കേണ്ട; വാട്സ്ആപ്പിൽ മെറ്റാ എഐയോട് രഹസ്യങ്ങൾ പറയുന്നത് അപകടം, മുന്നറിയിപ്പുമായി കമ്പനി

വാട്സ്ആപ്പിലെ എഐ (AI) ഫീച്ചറുകൾ ഉപയോഗിക്കുന്ന ഉപയോക്താക്കൾ ജാഗ്രത പാലിക്കണമെന്ന് മുന്നറിയിപ്പ്. സുഹൃത്തുക്കൾക്കും കുടുംബാംഗങ്ങൾക്കുമുൾപ്പെടെ വ്യക്തികളുമായുള്ള സാധാരണ സന്ദേശങ്ങൾക്ക് ലഭിക്കുന്ന എൻഡ്-ടു-എൻഡ് എൻക്രിപ്ഷൻ സ്വകാര്യതാ സുരക്ഷ വാട്സ്ആപ്പ് എഐ ചാറ്റുകൾക്ക് ലഭിക്കില്ലെന്ന് കമ്പനി വ്യക്തമാക്കി. സാധാരണ ചാറ്റുകളും എഐ ചാറ്റുകളും തമ്മിലുള്ള സ്വകാര്യതാ വ്യത്യാസങ്ങൾ വ്യക്തമാക്കുന്ന പുതിയ മാർഗ്ഗനിർദ്ദേശങ്ങളിലാണ് വാട്സ്ആപ്പ് ഇക്കാര്യം വ്യക്തമാക്കിയത്.

വാട്സ്ആപ്പിലെ വ്യക്തിഗത സന്ദേശങ്ങൾ പൂർണ്ണമായും എൻഡ്-ടു-എൻഡ് എൻക്രിപ്റ്റഡ് ആയതിനാൽ അയക്കുന്നയാൾക്കും ലഭിക്കുന്നയാൾക്കും മാത്രമാണ് അത് വായിക്കാൻ കഴിയുക. മെറ്റാ എഐക്ക് ഉപയോക്താക്കളുടെ ഇത്തരം വ്യക്തിഗത ചാറ്റുകൾ കാണാനോ വായിക്കാനോ സാധിക്കില്ല. എന്നാൽ ഉപയോക്താവ് നേരിട്ട് മെറ്റാ എഐയോട് ചോദിക്കുന്ന ചോദ്യങ്ങളും നൽകുന്ന സന്ദേശങ്ങളും എഐക്ക് വായിക്കാൻ സാധിക്കും. മറുപടികൾ നൽകാനും ഭാവിയിൽ എഐ മോഡലുകൾ മെച്ചപ്പെടുത്താനും കമ്പനി ഈ വിവരങ്ങൾ ഉപയോഗിച്ചേക്കാമെന്നതിനാൽ രഹസ്യ വിവരങ്ങൾ പങ്കുവെക്കരുതെന്ന് വാട്സ്ആപ്പ് നിർദ്ദേശിക്കുന്നു. ഉപയോക്താക്കൾക്ക് എഐയുമായുള്ള ചാറ്റുകൾ എപ്പോൾ വേണമെങ്കിലും ഡിലീറ്റ് ചെയ്യാൻ സാധിക്കും.

അതേസമയം, വാട്സ്ആപ്പിൽ ലഭ്യമാകുന്ന തേർഡ് പാർട്ടി എഐ (Third-party AI) ഏജന്റുകളുമായുള്ള സംഭാഷണങ്ങളുടെ സ്വകാര്യതാ നിയമങ്ങൾ തികച്ചും വ്യത്യസ്തമാണ്. ഇത്തരം സന്ദേശങ്ങൾ തേർഡ് പാർട്ടി ഏജന്റുകളുടെ സെർവറുകളിലാണ് കൈകാര്യം ചെയ്യപ്പെടുന്നത്. അതിനാൽ വാട്സ്ആപ്പ് ഇവയെ എൻഡ്-ടു-എൻഡ് എൻക്രിപ്റ്റഡ് ആയി കണക്കാക്കുന്നില്ല. ഉപകരണങ്ങൾക്കിടയിൽ മാത്രം സുരക്ഷിതമായിരിക്കുന്ന സാധാരണ ചാറ്റുകളിൽ നിന്ന് ഇത് തികച്ചും വ്യത്യസ്തമായതിനാൽ, രഹസ്യ വിവരങ്ങൾ യാതൊരു കാരണവശാലും ഇത്തരം തേർഡ് പാർട്ടി എഐ ഏജന്റുകളുമായി പങ്കുവെക്കരുതെന്നും മുന്നറിയിപ്പിൽ പറയുന്നു.