ന്യൂയോര്‍ക്ക്: ഇന്ത്യ-പാക് സംഘര്‍ഷമടക്കം ലോകത്തെ എട്ട് യുദ്ധങ്ങള്‍ അവസാനിപ്പിക്കാന്‍ സാധിച്ചെന്ന അവകാശവാദം ആവര്‍ത്തിച്ച് അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. ഐക്യരാഷ്ട്രസഭയുടെ 81-ാമത് പൊതുസഭയെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം. ഇന്ത്യയും പാകിസ്ഥാനും തമ്മിലുള്ള പ്രശ്‌നങ്ങള്‍ പരിഹരിച്ചത് അമേരിക്ക മുന്നോട്ടുവെച്ച വ്യാപാര-തീരുവ ഭീഷണികളെ തുടര്‍ന്നാണെന്ന് ട്രംപ് ആവര്‍ത്തിച്ചു.
പതിറ്റാണ്ടുകളായി നീണ്ടുനിന്ന പല യുദ്ധങ്ങളും തടയാനായത് വലിയൊരു നേട്ടമായാണ് കാണുന്നതെന്നും ഈ പ്രക്രിയയിലൂടെ നിരവധി ലോകനേതാക്കളുമായി വ്യക്തിബന്ധം സ്ഥാപിക്കാന്‍ സാധിച്ചെന്നും അദ്ദേഹം പറഞ്ഞു. തങ്ങളുടെ സമയോചിതമായ ഇടപെടല്‍ കാരണം മൂന്ന് കോടിയോളം ആളുകളുടെ ജീവന്‍ രക്ഷിക്കാനായെന്ന് പാകിസ്ഥാന്‍ പ്രധാനമന്ത്രി തനിക്ക് അയച്ച നന്ദിക്കത്തില്‍ വ്യക്തമാക്കിയതായും ട്രംപ് പ്രസംഗത്തില്‍ എടുത്തുപറഞ്ഞു. വ്യാപാരബന്ധങ്ങളും താരിഫുകളും നയതന്ത്രപരമായി ഉപയോഗിച്ചാണ് സമാധാനം കൈവരിച്ചതെന്നും അദ്ദേഹം കൂട്ടിച്ചേര്‍ത്തു.
റഷ്യന്‍, യുക്രെയ്ന്‍ നേതാക്കളുമായി തനിക്ക് അടുത്ത ബന്ധമുണ്ടെന്നും ലോകം പ്രതീക്ഷിക്കുന്നതിനേക്കാള്‍ വേഗത്തില്‍ ഇരുരാജ്യങ്ങളും തമ്മിലുള്ള യുദ്ധത്തിനും സമാധാനപരമായ പരിഹാരം കണ്ടെത്തുമെന്നും ട്രംപ് പ്രത്യാശ പ്രകടിപ്പിച്ചു.
'ഇന്ത്യ- പാക് സംഘര്‍ഷം അവസാനിപ്പിച്ചത് അമേരിക്ക'; വീണ്ടും അവകാശവാദവുമായി ട്രംപ്
Jaihind TV News Report
Jaihind TV Web Desk
Updated Oct 13, 2026
2 min read
201 reads
