തിരുവനന്തപുരം: എല്ലാവരെയും ഒരുപോലെ ചേർത്തുപിടിച്ചിരുന്ന കോൺഗ്രസ് തറവാട്ടിലെ വലിയൊരു കാരണവരായിരുന്നു അന്തരിച്ച മുതിർന്ന നേതാവ് തെന്നല ബാലകൃഷ്ണപിള്ളയെന്ന് മുഖ്യമന്ത്രി വി.ഡി. സതീശൻ അനുസ്മരിച്ചു. പ്രതിസന്ധി ഘട്ടങ്ങളിൽ അദ്ദേഹം മുന്നോട്ടുവെച്ചിരുന്ന ഫോർമുലകൾ എന്നും കോൺഗ്രസ് രാഷ്ട്രീയത്തിന് വലിയ കരുത്താണ് പകർന്നിരുന്നതെന്നും അദ്ദേഹം കൂട്ടിച്ചേർത്തു. കെപിസിസി ആസ്ഥാനമായ ഇന്ദിരാഭവനിൽ സംഘടിപ്പിച്ച തെന്നല ബാലകൃഷ്ണപിള്ളയുടെ ഒന്നാം ചരമവാർഷിക അനുസ്മരണ സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
കെപിസിസി പ്രസിഡന്റ് സണ്ണി ജോസഫ് അനുസ്മരണ സമ്മേളനത്തിൽ അധ്യക്ഷത വഹിച്ചു. കോൺഗ്രസ് പ്രസ്ഥാനത്തെയും യുഡിഎഫിനെയും കെട്ടുറപ്പോടെ മുന്നോട്ട് നയിക്കുന്നതിൽ തെന്നല വഹിച്ച പങ്കിനെ ചടങ്ങിൽ പങ്കെടുത്ത നേതാക്കൾ സ്മരിച്ചു.
ആഭ്യന്തരമന്ത്രി രമേശ് ചെന്നിത്തല, എഐസിസി ജനറൽ സെക്രട്ടറി ദീപ ദാസ് മുൻഷി, മന്ത്രി പി.സി. വിഷ്ണുനാഥ്, എംപിമാരായ കൊടിക്കുന്നിൽ സുരേഷ്, ബെന്നി ബഹനാൻ, മുതിർന്ന നേതാവ് എം.എം. ഹസൻ തുടങ്ങിയ പ്രമുഖർ ചടങ്ങിൽ സംബന്ധിക്കുകയും തെന്നല ബാലകൃഷ്ണപിള്ളയുടെ സ്മരണ പുതുക്കി സംസാരിക്കുകയും ചെയ്തു.
