ഐപിഎല്ലിലെ നാലാം മത്സരത്തിൽ ഗുജറാത്ത് ടൈറ്റൻസിനെ മൂന്ന് വിക്കറ്റിന് പരാജയപ്പെടുത്തി പഞ്ചാബ് കിംഗ്സിന് വിജയത്തുടക്കം. 163 റൺസ് വിജയലക്ഷ്യവുമായി ഇറങ്ങിയ പഞ്ചാബ് ഒരു ഘട്ടത്തിൽ 110-1 എന്ന ശക്തമായ നിലയിലായിരുന്നു. എന്നാൽ ക്യാപ്റ്റൻ ശ്രേയസ് അയ്യർ പുറത്തായതോടെ പഞ്ചാബ് ബാറ്റിംഗ് നിര തകർച്ച നേരിട്ടു. നെഹാൽ വധേര, ശശാങ്ക് സിംഗ്, മാർക്കസ് സ്റ്റോയിനിസ് എന്നിവർ നിശ്ചിത ഇടവേളകളിൽ മടങ്ങിയതോടെ സ്കോർ 110-2ൽ നിന്ന് 118-6ലേക്ക് വീണു. തോൽവി മുന്നിൽ കണ്ട ഘട്ടത്തിലാണ് അരങ്ങേറ്റക്കാരൻ കൂപ്പർ കൊണോലിയുടെ അവിശ്വസനീയമായ ഇന്നിംഗ്സ് പഞ്ചാബിനെ വിജയത്തിലേക്ക് നയിച്ചത്.
ഗുജറാത്തിനായി പ്രസിദ്ധ് കൃഷ്ണ മൂന്ന് വിക്കറ്റുകൾ വീഴ്ത്തി പഞ്ചാബിനെ സമ്മർദ്ദത്തിലാക്കിയിരുന്നു. എന്നാൽ മൂന്നാം നമ്പറിലെത്തിയ കൊണോലി 44 പന്തിൽ 72 റൺസുമായി പുറത്താകാതെ നിന്ന് പഞ്ചാബിനെ കരകയറ്റി. അവസാന ഘട്ടത്തിൽ 5 പന്തിൽ 11 റൺസെടുത്ത സേവിയർ ബാർട്ട്ലെറ്റും കൊണോലിക്ക് മികച്ച പിന്തുണ നൽകി. ഇതോടെ 19.1 ഓവറിൽ 7 വിക്കറ്റ് നഷ്ടത്തിൽ പഞ്ചാബ് ലക്ഷ്യം കണ്ടു. നേരത്തെ ഓപ്പണർ പ്രിയാൻഷ് ആര്യയെ(7) തുടക്കത്തിൽ തന്നെ നഷ്ടമായെങ്കിലും കൊണോലിയും പ്രഭ്‌സിമ്രാൻ സിംഗും(37) ചേർന്ന രണ്ടാം വിക്കറ്റ് കൂട്ടുകെട്ട് 76 റൺസ് അടിച്ചുകൂട്ടിയത് പഞ്ചാബിന് അടിത്തറയേകിയിരുന്നു.
ആദ്യം ബാറ്റിംഗിനിറങ്ങിയ ഗുജറാത്ത് ടൈറ്റൻസ് നിശ്ചിത 20 ഓവറിൽ 6 വിക്കറ്റ് നഷ്ടത്തിലാണ് 162 റൺസെടുത്തത്. ക്യാപ്റ്റൻ ശുഭ്മാൻ ഗില്ലും(39) സായ് സുദർശനും(12) ചേർന്ന് സ്ഫോടനാത്മകമായ തുടക്കമാണ് നൽകിയത്. എന്നാൽ പിന്നീട് കൃത്യമായ ഇടവേളകളിൽ വിക്കറ്റുകൾ വീഴ്ത്തി പഞ്ചാബ് ബൗളർമാർ ഗുജറാത്തിനെ പിടിച്ചുനിർത്തി. ജോസ് ബട്ലർ 38 റൺസും ഗ്ലെൻ ഫിലിപ്സ് 25 റൺസുമെടുത്ത് ഭേദപ്പെട്ട പ്രകടനം കാഴ്ചവെച്ചു. പഞ്ചാബിനായി വിജയകുമാർ വൈശാഖ് മൂന്നും യുസ്‌വേന്ദ്ര ചാഹൽ രണ്ടും വിക്കറ്റുകൾ വീഴ്ത്തി.
