മുംബൈ: ശസ്ത്രക്രിയയ്ക്കും ഐ.സി.യു. വാസത്തിനും വിധേയനായെന്ന തരത്തിൽ പ്രചരിച്ച വാർത്തകൾക്ക് വിശദീകരണവുമായി ബോളിവുഡ് താരം അമിതാഭ് ബച്ചൻ. താൻ യാതൊരു ശസ്ത്രക്രിയയ്ക്കും വിധേയനായിട്ടില്ലെന്നും, തന്റെ ബ്ലോഗ് കുറിപ്പ് തെറ്റായി വ്യാഖ്യാനിക്കപ്പെട്ടതാണെന്നും താരം വ്യക്തമാക്കി.
ലോകകപ്പ് ഫൈനലിൽ അർജന്റീന സ്‌പെയിനോട് തോറ്റ സംഭവത്തെക്കുറിച്ചാണ് താൻ ബ്ലോഗിൽ പരാമർശിച്ചതെന്നും, അത് തന്റെ ആരോഗ്യസ്ഥിതിയുമായി ബന്ധപ്പെടുത്തി ആളുകൾ തെറ്റിദ്ധരിക്കുകയായിരുന്നുവെന്നും അമിതാഭ് ബച്ചൻ ഒരു ഇംഗ്ലീഷ് മാധ്യമത്തോട് പ്രതികരിച്ചു.
"എനിക്ക് യാതൊരു പ്രശ്‌നവുമില്ല. ശസ്ത്രക്രിയയൊന്നും നടന്നിട്ടില്ല. ആ പോസ്റ്റ് തെറ്റിദ്ധരിക്കപ്പെട്ടതാണ്. ശസ്ത്രക്രിയയ്ക്കും ഐ.സി.യു. വാസത്തിനും ശേഷം വീട്ടിലെത്തുമ്പോൾ നേരിടേണ്ടിവരുന്ന ശാരീരിക ബുദ്ധിമുട്ടുകളെക്കുറിച്ച് ഒരു ഉദാഹരണം നൽകുകയായിരുന്നു ഞാൻ," എന്ന് ബച്ചൻ വ്യക്തമാക്കി.
ഒരു ചാമ്പ്യൻ പരാജയപ്പെടുമ്പോൾ ആ തിരിച്ചടിയെ അതിജീവിക്കുന്ന ഘട്ടമാണ് ഏറ്റവും പ്രയാസകരമെന്ന് പറയുന്നതിനായാണ് താൻ ആശുപത്രിയും ചികിത്സയും സംബന്ധിച്ച ഉദാഹരണം ഉപയോഗിച്ചതെന്നും അദ്ദേഹം പറഞ്ഞു.
ലോകകപ്പ് ഫൈനലിൽ നിലവിലെ ചാമ്പ്യനായിരുന്ന അർജന്റീനയും നായകൻ ലയണൽ മെസിയും നേരിട്ട തോൽവിയെക്കുറിച്ചായിരുന്നു തന്റെ പരാമർശമെന്നും, എന്നാൽ അത് തനിക്ക് സംഭവിച്ച കാര്യമായി ആളുകൾ തെറ്റിദ്ധരിച്ചുവെന്നും ബച്ചൻ വ്യക്തമാക്കി. ആരോഗ്യനില തൃപ്തികരമാണോ എന്ന ചോദ്യത്തിന് "ഇതുവരെ തീർച്ചയായും" എന്നായിരുന്നു അദ്ദേഹത്തിന്റെ മറുപടി.
നേരത്തെ പങ്കുവെച്ച ബ്ലോഗ് കുറിപ്പിൽ, "ആശുപത്രിയിൽ ശസ്ത്രക്രിയയ്ക്ക് വിധേയനായി ഐ.സി.യുവിൽ വിദഗ്ധരായ ഡോക്ടർമാരുടെയും മെഡിക്കൽ സംഘത്തിന്റെയും പരിചരണത്തിലായിരുന്നു. തുടർന്ന് ഡിസ്ചാർജ് ചെയ്ത് വീട്ടിലെത്തി. എന്നാൽ വീട്ടിലേക്കുള്ള ഈ മടങ്ങിവരവാണ് ശാരീരികമായും മാനസികമായും പ്രായോഗികമായും ഏറ്റവും പ്രയാസമേറിയ ഘട്ടം" എന്നായിരുന്നു അമിതാഭ് ബച്ചൻ കുറിച്ചിരുന്നത്.
തോൽവിയെ അതിജീവിക്കുന്നതിനെക്കുറിച്ചും താരം കുറിപ്പിൽ വിശദീകരിച്ചിരുന്നു. ആരാധിക്കപ്പെടുന്ന ജേതാവായ ഒരാൾക്കും ജീവിതത്തിൽ ഒരിക്കൽ തോൽവി നേരിടേണ്ടിവരുമെന്നും, അതിനെ ധൈര്യത്തോടെ നേരിടുന്നവരാണ് യഥാർഥ ചാമ്പ്യന്മാരായി തുടരുന്നതെന്നും അദ്ദേഹം പറഞ്ഞു.
"തോൽവിക്ക് ശേഷമുള്ള പ്രതികരണം ഓരോ വ്യക്തിയുടെയും തിരഞ്ഞെടുപ്പാണ്. ചിലർ പോരാട്ടം തുടരുമ്പോൾ ചിലർ ഭൂതകാലത്തിലെ വിജയങ്ങളിൽ മാത്രം ജീവിക്കും" എന്ന സന്ദേശത്തോടെയാണ് താരം കുറിപ്പ് അവസാനിപ്പിച്ചത്. എല്ലാവർക്കും സന്തോഷവും ആരോഗ്യവും ആശംസിച്ചുകൊണ്ടായിരുന്നു അമിതാഭ് ബച്ചന്റെ പ്രതികരണം.
