നിപ ആശങ്ക വേണ്ട; നിലവിലെ പരിശോധനാഫലങ്ങളെല്ലാം നെഗറ്റീവെന്ന് കെ. മുരളീധരന്‍; പ്രതിപക്ഷ വിമർശനങ്ങൾക്ക് മറുപടി

തിരുവനന്തപുരം: നിപ വൈറസ് കൂടുതല്‍ സ്ഥലങ്ങളിലേക്ക് വ്യാപിച്ചിട്ടില്ലെന്നും, ഇതുവരെ ലഭിച്ച പരിശോധനാഫലങ്ങളെല്ലാം നെഗറ്റീവാണെന്നും ആരോഗ്യമന്ത്രി കെ. മുരളീധരന്‍ അറിയിച്ചു. നിലവില്‍ പുതിയ കേസുകളൊന്നും റിപ്പോര്‍ട്ട് ചെയ്തിട്ടില്ല. വെന്റിലേറ്ററില്‍ ചികിത്സയില്‍ കഴിയുന്ന രോഗിയുടെ ആരോഗ്യനിലയില്‍ മാറ്റമില്ലാതെ തുടരുകയാണെന്നും മന്ത്രി വ്യക്തമാക്കി.

നിപ റിപ്പോര്‍ട്ട് ചെയ്ത സമയത്ത് കോഴിക്കോട്ടുണ്ടായിരുന്നെന്നും, ആവശ്യമായ എല്ലാവിധ നിര്‍ദ്ദേശങ്ങളും നല്‍കിയ ശേഷമാണ് തിരുവനന്തപുരത്തേക്ക് മടങ്ങിയതെന്നും അദ്ദേഹം പറഞ്ഞു. സംസ്ഥാനത്തെ മൊത്തത്തിലുള്ള സാഹചര്യം വിലയിരുത്തേണ്ടതുണ്ട്. വൈറസ് വ്യാപനം തടയുന്നതിനായി അതീവ ശക്തമായ പ്രതിരോധ നടപടികളാണ് സര്‍ക്കാര്‍ സ്വീകരിച്ചിട്ടുള്ളത്.

പ്രതിപക്ഷം നിപയെ രാഷ്ട്രീയ ആയുധമാക്കുന്നത് ശരിയല്ലെന്നും മന്ത്രി വിമര്‍ശിച്ചു. ഹൈ റിസ്‌ക് വിഭാഗത്തിലുള്ളവരുടെ പരിശോധനാഫലങ്ങളെല്ലാം നെഗറ്റീവാണ്. ഇനി കാര്യമായ ഫലങ്ങള്‍ വരാനില്ലെങ്കിലും, ജാഗ്രതയുടെ ഭാഗമായി എല്ലാ കേസുകളും പരിശോധിക്കുന്നുണ്ടെന്നും അദ്ദേഹം പറഞ്ഞു. ജനപ്രതിനിധികളുടെ യോഗം വിളിക്കുന്നതിനായി റവന്യൂമന്ത്രി നിലവില്‍ കോഴിക്കോടുണ്ടെന്നും ആരോഗ്യമന്ത്രി അറിയിച്ചു.