തിരുവനന്തപുരം: മലയാള സിനിമയില്‍ വേറിട്ട സിനിമാഭാഷയും നിലപാടുകളും ഉയര്‍ത്തിപ്പിടിച്ച ദേശീയ പുരസ്‌കാര ജേതാവായ പ്രശസ്ത സംവിധായകന്‍ ആര്‍. ശരത് (63) അന്തരിച്ചു. തിരുവനന്തപുരത്തെ സ്വകാര്യ ആശുപത്രിയില്‍ ചികിത്സയിലിരിക്കെയാണ് അന്ത്യം സംഭവിച്ചത്.
ഡോക്യുമെന്ററികളിലൂടെ സിനിമാരംഗത്തേക്ക് കടന്നുവന്ന ശരത്, പരിസ്ഥിതിയും മനുഷ്യനും തമ്മിലുള്ള ആഴത്തിലുള്ള ബന്ധവും സാമൂഹിക യാഥാര്‍ത്ഥ്യങ്ങളും പ്രമേയമാക്കി നിര്‍മ്മിച്ച 'സായാഹ്നം' എന്ന ചിത്രത്തിലൂടെയാണ് ശ്രദ്ധേയനാകുന്നത്. ഈ ചിത്രം ദേശീയ പുരസ്‌കാരത്തിനൊപ്പം നിരവധി കേരള സംസ്ഥാന ചലച്ചിത്ര പുരസ്‌കാരങ്ങളും സ്വന്തമാക്കി.
'സ്ഥിതി', 'ശീലാബതി', 'പരദേശി', 'ബുദ്ധനും ചാപ്ലിനും ചിരിക്കുന്നു', 'സ്വയം' തുടങ്ങി പ്രേക്ഷകരെ ചിന്തിപ്പിക്കുന്ന നിരവധി മികച്ച ചിത്രങ്ങള്‍ അദ്ദേഹം മലയാളത്തിന് സമ്മാനിച്ചു.
കേവലം പുരസ്‌കാരങ്ങള്‍ക്കപ്പുറം സിനിമയെ സാമൂഹിക ഇടപെടലിനുള്ള ശക്തമായ മാധ്യമമായി കണ്ട കലാകാരനായിരുന്നു അദ്ദേഹം. ശരതിന്റെ വിയോഗത്തില്‍ മലയാള ചലച്ചിത്ര ലോകവും സാംസ്‌കാരിക രംഗവും അനുശോചനം രേഖപ്പെടുത്തി.
ദേശീയ പുരസ്‌കാര ജേതാവായ സംവിധായകന്‍ ആര്‍. ശരത് അന്തരിച്ചു
Jaihind TV News Report
Jaihind TV Web Desk
Updated Oct 13, 2026
2 min read
229 reads
