കുംഭമേളയിലൂടെ സോഷ്യൽ മീഡിയയിൽ വൈറലായ യുവതിയുടെ വിവാദ വിവാഹവുമായി ബന്ധപ്പെട്ട അന്വേഷണത്തിനായി മധ്യപ്രദേശ് പോലീസ് സംഘം കൊച്ചിയിൽ തുടരുന്നു. യുവതിയെ കണ്ടെത്താൻ ഇന്നലെ നഗരത്തിന്റെ വിവിധ ഭാഗങ്ങളിൽ പോലീസ് പരിശോധന നടത്തിയെങ്കിലും ഫലമുണ്ടായില്ല. നിലവിൽ യുവതിയുടെ മൊഴി രേഖപ്പെടുത്താനാണ് തങ്ങളുടെ നീക്കമെന്ന് മധ്യപ്രദേശ് പോലീസ് അറിയിച്ചു.
യുവതിയെ തട്ടിക്കൊണ്ടുപോയതാണെന്ന പരാതിയിലാണ് ഭർത്താവിനെതിരെ മധ്യപ്രദേശിൽ കേസ് രജിസ്റ്റർ ചെയ്തിരിക്കുന്നത്. ഈ സാഹചര്യത്തിൽ യുവതിയെ കസ്റ്റഡിയിലെടുക്കാൻ പോലീസിന് നിയമപരമായ അധികാരമുണ്ട്. എന്നാൽ, നിലവിൽ യുവതിയെ കസ്റ്റഡിയിലെടുക്കേണ്ട സാഹചര്യമില്ലെന്നും കാര്യങ്ങൾ ചോദിച്ചറിഞ്ഞ് മൊഴി രേഖപ്പെടുത്താനാണ് മുൻഗണന നൽകുന്നതെന്നും പോലീസ് വൃത്തങ്ങൾ വ്യക്തമാക്കി.
യുവതിയും ഭർത്താവും കൊച്ചിയിലുണ്ടെന്ന രഹസ്യവിവരത്തെ തുടർന്നാണ് മധ്യപ്രദേശ് പോലീസ് കേരളത്തിലെത്തിയത്. പ്രാദേശിക പോലീസിന്റെ സഹായത്തോടെ ലോഡ്ജുകളിലും മറ്റ് താമസസ്ഥലങ്ങളിലും പരിശോധന നടത്തി വരികയാണ്. വിവാഹവുമായി ബന്ധപ്പെട്ട് പെൺകുട്ടിയുടെ വീട്ടുകാർ നൽകിയ പരാതിയിലാണ് അന്വേഷണം നടക്കുന്നത്. വരും ദിവസങ്ങളിലും അന്വേഷണം തുടരാനാണ് പോലീസ് തീരുമാനം.
