പുതിയ ഉടമകൾ, മികച്ച വിദേശതാരങ്ങൾ, കഴിഞ്ഞ സീസണിൽ ടീമിനെ മികച്ച രീതിയിൽ തിരിച്ചുകൊണ്ടുവന്ന പരിശീലകൻ എന്നിവരുടെ കരുത്തിൽ 13-ാം സീസൺ ഇന്ത്യൻ സൂപ്പർ ലീഗിനൊരുങ്ങുന്ന കേരള ബ്ലാസ്റ്റേഴ്സ് ആരാധകരുടെ പ്രതീക്ഷകൾ വാനോളമാണ്. ഇത്തവണ ഐ.എസ്.എൽ. കന്നി കിരീടം നേടാൻ കഴിയുമെന്നാണ് ആരാധകരുടെ ഉറച്ച വിശ്വാസം. ശനിയാഴ്ച ഐ.എസ്.എൽ. പോരാട്ടങ്ങൾക്ക് കിക്കോഫ് കുറിക്കുമ്പോൾ, ഞായറാഴ്ച വൈകീട്ട് അഞ്ച് മണിക്ക് ഇന്റർകാശിയുമായാണ് ബ്ലാസ്റ്റേഴ്സിന്റെ ആദ്യപോരാട്ടം. ടീമിന്റെ മോശം പ്രകടനത്തിൽ പ്രതിഷേധിച്ച് വിട്ടുനിന്നിരുന്ന ആരാധകക്കൂട്ടായ്മയായ 'മഞ്ഞപ്പട' വിലക്ക് പിൻവലിച്ച് സ്റ്റേഡിയത്തിലേക്ക് തിരിച്ചെത്തുന്നതും കൊച്ചിയിലെ ആദ്യ ഹോം മത്സരത്തെ വലിയ ആവേശത്തിലാക്കും.
ഷാർജ രാജകുടുംബാംഗമായ ഷെയ്ഖ് അഹ്‌മദ് ബിൻ ഫൈസൽ അൽ ഖാസിമിയുടെ ഉടമസ്ഥതയിലുള്ള 'അൽ ഫുർസാൻ സ്പോർട്സ് ഇൻവെസ്റ്റ്മെന്റ്' ക്ലബ്ബിന്റെ സമ്പൂർണ്ണ ഓഹരികളും സ്വന്തമാക്കിയതോടെയാണ് ബ്ലാസ്റ്റേഴ്സിൽ പുതിയ മാറ്റങ്ങൾക്ക് തുടക്കമായത്. മാഗ്‌നം സ്പോർട്സിൽ നിന്നാണ് ഇവർ ക്ലബ്ബിന്റെ നിയന്ത്രണം ഏറ്റെടുത്തത്. പുതിയ മാനേജ്മെന്റിന്റെ വരവോടെ ടീമിലേക്ക് പ്രമുഖ വിദേശ-ഇന്ത്യൻ താരങ്ങളുടെ വലിയ നിര തന്നെയെത്തി. നായകൻ അഡ്രിയൻ ലൂണയെ നിലനിർത്തിയ ക്ലബ്ബ് മുന്നേറ്റനിരയിലേക്ക് ആന്ദ്രെ ഗ്രീൻ, മോമോ യാൻസനെ എന്നിവരെയും മധ്യനിരയിലേക്ക് നെബോഷ കൊസോവിച്ചിനെയും പ്രതിരോധത്തിലേക്ക് ജെയിംസ് ബോൾട്ടനെയും എത്തിച്ചു. മലയാളിയായ മുഹമ്മദ് സനാൻ, ഗോൾകീപ്പർ അമരീന്ദർ സിങ് തുടങ്ങി പ്രമുഖ ഇന്ത്യൻ താരങ്ങളും എത്തിയതോടെ ഏകദേശം 22 കോടിയോളം രൂപ വിപണിമൂല്യമുള്ള ശക്തമായ നിരയായി ബ്ലാസ്റ്റേഴ്സ് മാറി.
കഴിഞ്ഞ സീസണിൽ തരംതാഴ്ത്തൽ ഭീഷണിയിലായിരുന്ന ബ്ലാസ്റ്റേഴ്സിനെ ഏഴ് കളിയിൽ അഞ്ച് ജയവും ഒരു സമനിലയും നേടി മികച്ച രീതിയിൽ തിരിച്ചെത്തിച്ച ഇംഗ്ലീഷ് പരിശീലകൻ ആഷ്ലി വെസ്റ്റ് വുഡിലാണ് ആരാധകരുടെ പ്രധാന പ്രതീക്ഷ. മുൻപ് ബെംഗളൂരു എഫ്.സി, എ.ടി.കെ. കൊൽക്കത്ത എന്നീ ടീമുകളിൽ പ്രവർത്തിച്ച് പരിചയസമ്പത്തുള്ള വെസ്റ്റ് വുഡിന് ലഭിക്കുന്ന ആദ്യ പൂർണ്ണ സീസണാണിത്. ഇത്തവണ പരിശീലകന് അനുയോജ്യരായ താരങ്ങളെ ലഭിച്ചതിനാൽ തനിക്ക് പ്രിയപ്പെട്ട 4-4-2 ഫോർമേഷനിൽ ബ്ലാസ്റ്റേഴ്സിനെ കളിപ്പിക്കാനാണ് വെസ്റ്റ് വുഡ് പദ്ധതിയിടുന്നത്.
