ലോകത്ത് ഏറ്റവും കൂടുതൽ ആളുകൾ ഉപയോഗിക്കുന്ന വെബ് ബ്രൗസറുകളിലൊന്നായ ഗൂഗിൾ ക്രോം (Google Chrome), ദീർഘകാല ഉപയോഗത്തിന് ശേഷം വേഗത കുറയുന്നത് സാധാരണമാണ്. വെബ് പേജുകൾ ലോഡ് ചെയ്യാൻ കൂടുതൽ സമയം എടുക്കുന്നതും ബ്രൗസർ ഹാങ്ങാകുന്നതും കംപ്യൂട്ടറിലെയും മൊബൈൽ ഫോണിലെയും റാം (RAM) അമിതമായി ഉപയോഗിക്കുന്നതിനെ തുടർന്നാണ് സംഭവിക്കുന്നത്.
ക്രോമിന്റെ പ്രവർത്തന വേഗത മെച്ചപ്പെടുത്താൻ ചില ലളിതമായ മാർഗങ്ങൾ പിന്തുടരാം.
ആവശ്യമില്ലാത്ത ടാബുകൾ അടയ്ക്കുക - ബ്രൗസറിൽ ഒരേസമയം നിരവധി ടാബുകൾ തുറന്നുവെക്കുന്നത് റാം ഉപയോഗം വർധിപ്പിക്കുകയും ക്രോമിന്റെ വേഗത കുറയ്ക്കുകയും ചെയ്യും. ഉപയോഗമില്ലാത്ത ടാബുകൾ ക്ലോസ് ചെയ്യുന്നത് ബ്രൗസറിന്റെ പ്രകടനം മെച്ചപ്പെടുത്താൻ സഹായിക്കും.
അനാവശ്യ എക്സ്റ്റൻഷനുകൾ നീക്കം ചെയ്യുക -ക്രോമിൽ ഇൻസ്റ്റാൾ ചെയ്തിട്ടുള്ള എല്ലാ എക്സ്റ്റൻഷനുകളും ആവശ്യമായിരിക്കണമെന്നില്ല. ഉപയോഗിക്കാത്തതും ആവശ്യമില്ലാത്തതുമായ എക്സ്റ്റൻഷനുകൾ നീക്കം ചെയ്യുന്നത് ബ്രൗസറിന്റെ വേഗത വർധിപ്പിക്കും.
ബ്രൗസിങ് ഡാറ്റ ക്ലിയർ ചെയ്യുക -ക്രോമിലെ 'Clear Browsing Data' ഓപ്ഷൻ ഉപയോഗിച്ച് ഹിസ്റ്ററി, കുക്കീസ്, കാഷ് ഫയലുകൾ എന്നിവ ഇടയ്ക്കിടെ നീക്കം ചെയ്യുന്നത് ബ്രൗസിങ് അനുഭവം കൂടുതൽ സുഗമമാക്കും.
ക്രോം അപ്‌ഡേറ്റ് ചെയ്യുക - ബ്രൗസർ എപ്പോഴും ഏറ്റവും പുതിയ വേർഷനിൽ നിലനിർത്തുന്നത് പ്രധാനമാണ്. സുരക്ഷാ പരിഷ്‌കരണങ്ങൾക്കൊപ്പം പ്രകടനം മെച്ചപ്പെടുത്തുന്ന നിരവധി അപ്‌ഡേറ്റുകളും ഗൂഗിൾ പുതിയ പതിപ്പുകളിൽ ഉൾപ്പെടുത്താറുണ്ട്.
'Memory Saver' ഓൺ ചെയ്യാം - ക്രോമിലെ Memory Saver ഫീച്ചർ പ്രവർത്തനക്ഷമമാക്കുന്നത് ഉപയോഗത്തിലില്ലാത്ത ടാബുകളുടെ റാം ഉപയോഗം കുറയ്ക്കുകയും സിസ്റ്റത്തിന്റെ മൊത്തത്തിലുള്ള പ്രകടനം മെച്ചപ്പെടുത്തുകയും ചെയ്യും.
ചെറിയ ചില ക്രമീകരണങ്ങൾ മാത്രം വരുത്തിയാൽ തന്നെ ഗൂഗിൾ ക്രോമിന്റെ വേഗത വർധിപ്പിക്കാനും ബ്രൗസിങ് അനുഭവം കൂടുതൽ മികച്ചതാക്കാനും സാധിക്കും.
