ബജറ്റിന്റെ നാലിരട്ടിയിലേറെ കളക്ഷൻ നേടി തമിഴ് ചിത്രം ‘ഡിസി’ തിയേറ്ററുകളിൽ വിജയക്കുതിപ്പ് നടത്തിയതിന് പിന്നാലെ സമ്മാനവിതരണവുമായി ബന്ധപ്പെട്ട് വിവാദം. ചിത്രത്തിന്റെ ബ്ലോക്ക്ബസ്റ്റർ വിജയത്തിൽ സന്തോഷം പ്രകടിപ്പിച്ച് നിർമാതാക്കളായ സൺ പിക്ചേഴ്സ് സംവിധായകൻ അരുൺ മാതേശ്വരനും നായകൻ ലോകേഷ് കനകരാജിനും സംഗീത സംവിധായകൻ അനിരുദ്ധ് രവിചന്ദറിനും ബ്രാൻഡ് ന്യൂ ബിഎംഡബ്ല്യൂ കാറുകൾ സമ്മാനമായി നൽകി.
എന്നാൽ ചിത്രത്തിലെ പ്രധാന കഥാപാത്രമായ ‘ചന്ദ്ര’യെ അവതരിപ്പിച്ച വാമിഖ ഗബ്ബിക്ക് സമ്മാനം നൽകാതിരുന്നതാണ് ഇപ്പോൾ സമൂഹമാധ്യമങ്ങളിൽ ചർച്ചയാകുന്നത്. ചിത്രത്തിന്റെ വിജയത്തിൽ വാമിഖയുടെ കഥാപാത്രത്തിനും നിർണായക പങ്കുണ്ടായിരുന്നിട്ടും നടിയെ അംഗീകരിക്കുന്നതിൽ നിർമാതാക്കൾ വീഴ്ച വരുത്തിയെന്നാണ് ഒരു വിഭാഗം ആരാധകരുടെ വിമർശനം.
‘ചന്ദ്ര’യായി വാമിഖ നടത്തിയ പ്രകടനത്തിന് തിയേറ്ററുകളിൽ വലിയ കൈയടി ലഭിച്ചിരുന്നുവെന്നും സിനിമയുടെ വിജയം കൂട്ടായ പരിശ്രമത്തിന്റെ ഫലമാണെന്നും സോഷ്യൽ മീഡിയ ഉപയോക്താക്കൾ ചൂണ്ടിക്കാട്ടുന്നു. നടിയെ ഒഴിവാക്കിയ നടപടി അനീതിയാണെന്നും ചിലർ വിമർശിച്ചു. തമിഴ് സിനിമാ മേഖലയിലെ ഇത്തരം പ്രവണതകൾ ലിംഗവിവേചനത്തിന്റെ പ്രതിഫലനമാണെന്ന ആരോപണവും വാമിഖയുടെ ആരാധകരിൽ നിന്ന് ഉയരുന്നുണ്ട്.
ഏകദേശം 25 കോടി രൂപ ബജറ്റിൽ ഒരുക്കിയ ‘ഡിസി’ ആഗോള ബോക്സ് ഓഫീസിൽ 100 കോടി രൂപയിലധികം നേടിയതായാണ് റിപ്പോർട്ടുകൾ. ‘റോക്കി’, ‘സാനി കായിദം’, ‘ക്യാപ്റ്റൻ മില്ലർ’ എന്നീ ചിത്രങ്ങൾക്ക് ശേഷം അരുൺ മാതേശ്വരൻ സംവിധാനം ചെയ്ത ചിത്രമാണിത്. ലോകേഷ് കനകരാജ് നായകനായി അരങ്ങേറ്റം കുറിച്ച ചിത്രം എന്ന പ്രത്യേകതയും ‘ഡിസി’ക്കുണ്ട്.
സൺ പിക്ചേഴ്സിന്റെ ബാനറിൽ കലാനിധി മാരനാണ് ചിത്രം നിർമിച്ചത്. സഞ്ജന കൃഷ്ണമൂർത്തി, അവിനാശ് എന്നിവരാണ് ചിത്രത്തിലെ മറ്റ് പ്രധാന താരങ്ങൾ.
മുകേഷ് ജിയാണ് ഛായാഗ്രഹണം നിർവഹിച്ചത്. ജി.കെ. പ്രസന്നയാണ് ചിത്രസംയോജനം. ഹരീഷ് അരുൺ എം അസോസിയേറ്റ് എഡിറ്ററായും കണ്ണൻ എസ് കലാസംവിധായകനായും പ്രവർത്തിച്ചു. പി.സി. സ്റ്റണ്ട്സ് ആക്ഷൻ കൊറിയോഗ്രഫി നിർവഹിച്ചു. അരുൺ മാതേശ്വരനാണ് വസ്ത്രാലങ്കാരം നിർവഹിച്ചത്. പെരുമാൾ ശെൽവം കോസ്റ്റ്യൂമറായും വിനോദ് സുകുമാരൻ ചമയവിഭാഗത്തിലും പ്രവർത്തിച്ചു.
