ഇടുക്കി: നിയമസഭാ തിരഞ്ഞെടുപ്പിലുണ്ടായ കനത്ത തിരിച്ചടിയ്ക്ക് കാരണം പ്രാദേശിക-ജില്ലാ നേതാക്കളുടെ മാഫിയാ ബന്ധങ്ങളും ഭരണകാലത്തെ വഴിവിട്ട സ്വത്തുസമ്പാദനവുമാണെന്ന് സി.പി.എം അടിമാലി വിപുലീകൃത ജില്ലാ കമ്മറ്റി യോഗത്തില്‍ പാര്‍ട്ടി പ്രവര്‍ത്തകരുടെ രൂക്ഷവിമര്‍ശനം. പാര്‍ട്ടി നേതാക്കള്‍ ജനങ്ങളില്‍ നിന്നും അകന്നതും ചില നേതാക്കള്‍ സ്വന്തം താല്‍പ്പര്യങ്ങള്‍ക്ക് മുന്‍ഗണന നല്‍കിയതും ജനരോഷത്തിന് കാരണമായെന്ന് സമ്മേളന പ്രതിനിധികള്‍ തുറന്നടിച്ചു.
സി.പി.എം ഇടുക്കി ജില്ലാ സെക്രട്ടറി സി.വി. വര്‍ഗീസിനെതിരെ യോഗത്തില്‍ കടുത്ത വിമര്‍ശനമാണ് ഉയര്‍ന്നത്. ജില്ലാ സെക്രട്ടറിക്ക് ക്വാറി-റിയല്‍ എസ്റ്റേറ്റ് മാഫിയകളുമായി അടുത്ത ബന്ധമുണ്ടെന്നും ഇത് പാര്‍ട്ടിയുടെ പ്രതിച്ഛായയെ കാര്യമായി ബാധിച്ചുവെന്നും പ്രതിനിധികള്‍ ആരോപിച്ചു. ജനകീയ വിഷയങ്ങളില്‍ ഇടപെടുന്നതിന് പകരം ക്വാറി-ഭൂമാഫിയ ഗ്രൂപ്പുകളെ സംരക്ഷിക്കുന്ന നിലപാടാണ് ചില നേതാക്കള്‍ സ്വീകരിച്ചതെന്ന് ചര്‍ച്ചകളില്‍ വിമര്‍ശനമുയര്‍ന്നു.
എം.എം. മണിയെ തിരഞ്ഞെടുപ്പ് മത്സര രംഗത്തുനിന്ന് മാറ്റിനിര്‍ത്തിയത് പാര്‍ട്ടിക്ക് വലിയ തിരിച്ചടിയായെന്ന് പ്രവര്‍ത്തകര്‍ ചൂണ്ടിക്കാട്ടി. ജില്ലയിലെ മലയോര മേഖലകളില്‍ പാര്‍ട്ടിയെ ഉറപ്പിച്ചുനിര്‍ത്താന്‍ സാധിച്ചിരുന്ന എം.എം. മണിയുടെ അഭാവം വോട്ടെടുപ്പില്‍ പ്രകടമായി പ്രതിഫലിച്ചെന്നും പ്രതിനിധികള്‍ അഭിപ്രായപ്പെട്ടു. അടിമാലിയില്‍ നടന്ന യോഗത്തില്‍ ഉയര്‍ന്ന വിമര്‍ശനങ്ങള്‍ ജില്ലാ നേതൃത്വത്തെ പ്രതിരോധത്തിലാക്കിയിട്ടുണ്ട്.
സി.പി.എം അടിമാലി യോഗത്തില്‍ നേതാക്കള്‍ക്കെതിരെ രൂക്ഷവിമര്‍ശനം: 'മാഫിയാ ബന്ധവും സ്വത്തുസമ്പാദനവും പരാജയകാരണമായി'
Jaihind TV News Report
Jaihind TV Web Desk
Updated Oct 13, 2026
2 min read
118 reads
