ഏഷ്യൻ ഗെയിംസിൽ മെഡൽ വേട്ട തുടരുന്നു: സർവേഷ് കുഷാരെയ്ക്ക് വെള്ളി; ഡെക്കാത്‌ലണിൽ തേജശ്വിൻ ശങ്കറിന് വെങ്കലം

നഗോയ ഏഷ്യൻ ഗെയിംസ് അത്‌ലറ്റിക്‌സിൽ ഇന്ത്യയുടെ മെഡൽ വേട്ട തുടരുന്നു. വനിതാ ലോങ് ജംപിൽ മലയാളി താരം ആൻസി സോജൻ വെള്ളി കരസ്ഥമാക്കിയതിന് പിന്നാലെ പുരുഷന്മാരുടെ ഹൈജംപിൽ സർവേഷ് കുഷാരെയും ഇന്ത്യക്കായി വെള്ളി മെഡൽ നേടി. ഇതിനുപുറമെ വനിതകളുടെ 3000 മീറ്റർ സ്റ്റീപിൾ ചേസ്, 200 മീറ്റർ, പുരുഷന്മാരുടെ ഡെക്കാത്‌ലൺ എന്നീ ഇനങ്ങളിലും ഇന്ത്യ മെഡലുകൾ സ്വന്തമാക്കി.

ഹൈജംപിൽ 2.25 മീറ്റർ ഉയരം മറികടന്നാണ് സർവേഷ് കുഷാരെ വെള്ളി മെഡൽ കഴുത്തിലണിഞ്ഞത്. ഈ ഇനത്തിൽ തായ്‌വാന്റെ ഷാവോ സുവാൻ ഫു സ്വർണവും കൊറിയയുടെ സംഗിയോക് വൂ വെങ്കലവും നേടി. വനിതകളുടെ 3000 മീറ്റർ സ്റ്റീപിൾ ചേസിൽ ഇന്ത്യയുടെ പാരുൾ ചൗധരി വെങ്കല മെഡൽ നേടി. വനിതകളുടെ 200 മീറ്ററിൽ 23.20 സെക്കൻഡിൽ ഫിനിഷ് ചെയ്ത് മൂന്നാമതെത്തിയ ഹരിത ഭദ്രയും ഇന്ത്യക്കായി വെങ്കലം സമ്മാനിച്ചു.

പുരുഷന്മാരുടെ ഡെക്കാത്‌ലണിൽ തകർപ്പൻ പ്രകടനത്തോടെ തേജശ്വിൻ ശങ്കറാണ് ഇന്ത്യക്കായി വെങ്കല മെഡൽ നേടിയത്. പത്ത് ഇനങ്ങളിൽ നിന്നായി ആകെ 7934 പോയന്റാണ് തേജശ്വിൻ സ്വന്തമാക്കിയത്. ഡെക്കാത്‌ലണിലെ അവസാന ഇനമായ 1500 മീറ്ററിൽ ഒന്നാമതെത്തിയതും തേജശ്വിനായിരുന്നു. 8123 പോയന്റോടെ ജപ്പാൻ താരം യുമ മരുയാമ ഈ ഇനത്തിൽ സ്വർണം നേടി.