തിരുവനന്തപുരം: ഈ ഓണക്കാലത്ത് സർവ്വകാല റെക്കോഡ് വരുമാനം നേടി കെ.എസ്.ആർ.ടി.സി. ആഗസ്റ്റ് 31-ലെ ഒറ്റ ദിവസത്തെ ടിക്കറ്റ് വരുമാനത്തിലൂടെ 10.8 കോടി രൂപയാണ് കോർപ്പറേഷൻ സമാഹരിച്ചത്. കഴിഞ്ഞ വർഷം രേഖപ്പെടുത്തിയ 10.2 കോടി രൂപയുടെ റെക്കോഡാണ് ഇതോടെ മറികടന്നത്. ഓണം തിരക്ക് പൂർണ്ണമായി പരിഹരിക്കുന്നതിനായി 4,461 സർവീസുകളാണ് ഇത്തവണ കെ.എസ്.ആർ.ടി.സി ഓപ്പറേറ്റ് ചെയ്തത്. യാത്രക്കാർക്കായി നിരവധി ദീർഘദൂര സർവീസുകളും പ്രത്യേക സ്പെഷ്യൽ സർവീസുകളും സജ്ജമാക്കിയിരുന്നു. ദീർഘദൂര യാത്രക്കാരുടെ എണ്ണത്തിൽ ഉണ്ടായ വൻ വർധനവാണ് ഈ ചരിത്ര നേട്ടത്തിന് പ്രധാന കാരണമായത്.
ചതയം ദിനത്തിൽ മാത്രം 8.07 കോടി രൂപയുടെ റെക്കോഡ് കളക്ഷൻ രേഖപ്പെടുത്തി. അന്ന് 22,02,992 പേരാണ് കെ.എസ്.ആർ.ടി.സി ബസുകളിൽ യാത്ര ചെയ്തത്. ഉത്രാട ദിനത്തിൽ 7.88 കോടി രൂപയും തിരുവോണ ദിനത്തിൽ 4.77 കോടി രൂപയും ടിക്കറ്റ് ഇനത്തിൽ വരുമാനം ലഭിച്ചു.
