ന്യൂഡൽഹി: സ്റ്റേറ്റ് ബാങ്ക് ഓഫ് ഇന്ത്യ (SBI) സാലറി അക്കൗണ്ട് ഉടമകൾക്ക് മറ്റ് ബാങ്കുകളുടെ എ.ടി.എമ്മുകളിലും ഓട്ടോമേറ്റഡ് ഡെപ്പോസിറ്റ് കം വിത്‌ഡ്രോവൽ മെഷീനുകളിലും നടത്താവുന്ന പ്രതിമാസ സൗജന്യ ഇടപാടുകളുടെ എണ്ണം കുറച്ചു. നിലവിൽ ലഭിച്ചിരുന്ന 10 സൗജന്യ ഇടപാടുകൾ ഇനിമുതൽ അഞ്ചായി ചുരുങ്ങും. ഒക്ടോബർ ഒന്നു മുതലാണ് ഈ പുതിയ പരിഷ്കാരം നിലവിൽ വരുന്നത്.
പണം പിൻവലിക്കുന്നത് ഉൾപ്പെടെയുള്ള സാമ്പത്തിക ഇടപാടുകൾക്കും ബാലൻസ് പരിശോധന പോലുള്ള സാമ്പത്തികേതര ഇടപാടുകൾക്കും ഈ അഞ്ച് ഇടപാടുകളുടെ പരിധി ബാധകമായിരിക്കും. സൗജന്യ പരിധി കഴിഞ്ഞുള്ള ഓരോ അധിക പണം പിൻവലിക്കലിനും 23 രൂപയും ജി.എസ്.ടിയും ഈടാക്കും. സാമ്പത്തികേതര ഇടപാടുകൾക്ക് 11 രൂപയും ജി.എസ്.ടിയുമാണ് ചാർജ് ഈടാക്കുക.
അതേസമയം, സാലറി അക്കൗണ്ട് ഒഴികെയുള്ള മറ്റ് സാധാരണ എസ്.ബി.ഐ അക്കൗണ്ടുകൾക്ക് മറ്റ് ബാങ്ക് എ.ടി.എമ്മുകളിൽ നിലവിലുള്ള അഞ്ച് സൗജന്യ ഇടപാടുകൾ മാറ്റമില്ലാതെ തുടരും. കൂടാതെ എസ്.ബി.ഐ അക്കൗണ്ട് ഉടമകൾക്ക് സ്വന്തം ബാങ്കിന്റെ എ.ടി.എമ്മുകളിൽ പ്രതിമാസം ലഭിക്കുന്ന 10 സൗജന്യ ഇടപാടുകളുടെ ആനുകൂല്യത്തിലും മാറ്റമുണ്ടാകില്ല.
