"വിദ്യാർത്ഥികളുടെ ശബ്ദത്തെ തടയാനാവില്ല": പോലീസിനെതിരെയും കേന്ദ്രത്തിനെതിരെയും ശക്തമായ മുന്നറിയിപ്പുമായി രാഹുൽ ഗാന്ധി

പ്രത്യേക തീവ്ര വോട്ടർ പട്ടിക പരിഷ്കരണത്തിലെ (SIR) ക്രമക്കേടുകൾ ആരോപിച്ചും മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ്‌ കുമാറിനെതിരെയും സമരം ചെയ്തതിനെ തുടർന്ന് പോലീസിന്റെ അതിക്രമത്തിനിരയായ വിദ്യാർത്ഥികളുമായി രാഹുൽ ഗാന്ധി കൂടിക്കാഴ്ച നടത്തി. ന്യൂഡൽഹിയിലെ 10 ജൻപഥിലുള്ള സോണിയ ഗാന്ധിയുടെ വസതിയിലാണ് നാഷണൽ സ്റ്റുഡന്റ്സ് യൂണിയൻ ഓഫ് ഇന്ത്യ (NSUI) പ്രവർത്തകർ ഉൾപ്പെടെയുള്ള വിദ്യാർത്ഥികളെ രാഹുൽ കണ്ടത്. രാജ്യത്തിന്റെ ശബ്ദമായ പ്രതിഷേധിക്കുന്ന വിദ്യാർത്ഥികളെ വഴിതടയരുതെന്ന് പ്രധാനമന്ത്രി നരേന്ദ്ര മോദിയോട് ആവശ്യപ്പെട്ട രാഹുൽ ഗാന്ധി, അതിക്രമത്തിന് മുതിർന്ന പ്രധാനമന്ത്രി മുതൽ പോലീസ് കോൺസ്റ്റബിൾമാർ വരെയുള്ളവർക്കെതിരെ നടപടി സ്വീകരിക്കുമെന്നും ഉറപ്പുനൽകി.

പോലീസ് കസ്റ്റഡിയിൽ വച്ച് തങ്ങൾക്ക് നേരിടേണ്ടി വന്ന ക്രൂരമായ പീഡനങ്ങൾ വിദ്യാർത്ഥികൾ രാഹുൽ ഗാന്ധിയോട് വിശദീകരിച്ചു. സമരത്തിൽ പങ്കെടുത്തതിന് 'പാഠം പഠിപ്പിക്കുക' എന്ന ലക്ഷ്യത്തോടെ പോലീസ് ഉദ്യോഗസ്ഥർ തങ്ങളെ ക്രൂരമായി മർദിച്ചെന്നും, സ്വകാര്യ ഭാഗങ്ങളിൽ പോലുമടിച്ച് കേട്ടാലറയ്ക്കുന്ന ഭാഷയിൽ അധിക്ഷേപിച്ചെന്നും അവർ ആരോപിച്ചു. അടുത്തിടെ നടന്ന പ്രതിഷേധങ്ങൾക്കിടെ നിരവധി വിദ്യാർത്ഥികളെയും പ്രതിപക്ഷ പാർട്ടി പ്രവർത്തകരെയും കസ്റ്റഡിയിലെടുത്ത് നഗരത്തിൽ നിന്ന് വളരെ അകലെയുള്ള കേന്ദ്രങ്ങളിലേക്ക് മാറ്റിയിരുന്നു.

പ്രതിഷേധിച്ച വിദ്യാർത്ഥികളെ കോൺഗ്രസിന്റെ "സിംഹങ്ങളും സിംഹക്കുട്ടികളും" എന്ന് വിശേഷിപ്പിച്ച രാഹുൽ, ഒരു കാരണവശാലും ഭയപ്പെടരുതെന്ന് ആഹ്വാനം ചെയ്തു. പരിക്കേറ്റ ഒരു വിദ്യാർത്ഥിനിയെ പരിചയപ്പെടുത്തിക്കൊണ്ട്, "ഇവൾ മർദനമേറ്റിട്ടും ഭയന്നില്ല, ഇവളുടെ മനസ്സിൽ ആരോടും വെറുപ്പുമില്ല" എന്ന് അദ്ദേഹം പറഞ്ഞു. പ്രധാനമന്ത്രി നരേന്ദ്ര മോദിയും കേന്ദ്ര ആഭ്യന്തരമന്ത്രി അമിത് ഷായും ജനങ്ങളുടെ ഒന്നിച്ചുള്ള ശബ്ദത്തെയാണ് നേരിടുന്നത്. ജാതിയോ മതമോ ലിംഗഭേദമോ ഇല്ലാതെ ഒന്നിച്ചുനിൽക്കുന്ന ഈ ഇന്ത്യയുടെ ആകെ ശബ്ദത്തിന് മുന്നിൽ തടസ്സമായി നിൽക്കരുതെന്ന് രാഹുൽ ഗാന്ധി പ്രധാനമന്ത്രിയോട് നിർദ്ദേശിച്ചു.

പോലീസിന്റെ അതിക്രമങ്ങൾ വീഡിയോകളായും മറ്റ് തെളിവുകളായും പകർത്തി സൂക്ഷിക്കാൻ വിദ്യാർത്ഥികളോട് അദ്ദേഹം ആവശ്യപ്പെട്ടു. പ്രക്ഷോഭങ്ങൾ അവസാനിക്കുമ്പോൾ വിദ്യാർത്ഥികളെ മർദിച്ച ഏത് ഉന്നതനായാലും പോലീസുകാരനായാലും നിയമത്തിന് മുന്നിൽ കൊണ്ടുവന്ന് ശിക്ഷ ഉറപ്പാക്കുമെന്നും അദ്ദേഹം കൂട്ടിച്ചേർത്തു. ജനാധിപത്യപരമായ ശബ്ദങ്ങളെ അടിച്ചമർത്താൻ ശ്രമിക്കുന്നവർ നിയമനടപടി നേരിടേണ്ടി വരുമെന്ന് പിന്നീട് 'X' (ട്വിറ്റർ) ലൂടെയും അദ്ദേഹം ഓർമ്മിപ്പിച്ചു. ശാന്തമായ പ്രതിഷേധം വിദ്യാർത്ഥികളുടെ അവകാശമാണെന്നും അത് തട്ടിയെടുക്കാൻ ആരെയും അനുവദിക്കില്ലെന്നും അദ്ദേഹം വ്യക്തമാക്കി.

കൂടിക്കാഴ്ചയ്ക്കിടെ, പരിക്കേറ്റ ഒരു വിദ്യാർത്ഥി മഹാത്മാഗാന്ധിയുടെ പ്രിയപ്പെട്ട ഭജനയായ "വൈഷ്ണവ ജന തോ" പുല്ലാങ്കുഴലിൽ വായിക്കുകയും "വെറുപ്പിന് സ്നേഹം കൊണ്ട് മറുപടി നൽകും" എന്ന് പറയുകയും ചെയ്തു. പോലീസിന്റെ മർദനത്തിൽ ഒരു വിദ്യാർത്ഥിനിക്ക് ചെവിക്ക് പരിക്കേറ്റ് കേൾവിശക്തി നഷ്ടപ്പെട്ടപ്പോൾ, മറ്റൊരു വിദ്യാർത്ഥിനി തനിക്ക് സ്വകാര്യ ഭാഗങ്ങളിൽ മർദനമേറ്റതായും വെളിപ്പെടുത്തി. വിദ്യാർത്ഥികൾ ഉന്നയിച്ച ഈ ഗുരുതരമായ ആരോപണങ്ങളിൽ ഡൽഹി പോലീസിന്റെ ഔദ്യോഗിക പ്രതികരണം ലഭ്യമായിട്ടില്ല.