തിരുവനന്തപുരം: ഓം പ്രകാശ് മാഥുർ ഒക്ടോബർ 23-ന് കേരളത്തിന്റെ ഗവർണറായി സത്യപ്രതിജ്ഞ ചെയ്യും. ഉച്ചയ്ക്ക് 12-നും 12.30-നും ഇടയിൽ ലോക് ഭവൻ ഓഡിറ്റോറിയത്തിലാണ് സത്യപ്രതിജ്ഞാ ചടങ്ങ് നടക്കുക. കേരള ഹൈക്കോടതി ചീഫ് ജസ്റ്റിസ് ബഹു. ശ്രീ സൗമെൻ സെൻ നിയുക്ത ഗവർണർക്ക് സത്യവാചകം ചൊല്ലിക്കൊടുക്കും.
തമിഴ്നാട് ഗവർണറായി സ്ഥലംമാറ്റപ്പെട്ട രാജേന്ദ്ര വിശ്വനാഥ് ആർലേക്കറിന്റെ പിൻഗാമിയായാണ് ഓം പ്രകാശ് മാഥുർ കേരളത്തിന്റെ 29-ാമത് ഗവർണറാകുന്നത്. മുമ്പ് സിക്കിം ഗവർണറായി സേവനമനുഷ്ഠിച്ചിട്ടുള്ള അദ്ദേഹം, രാജസ്ഥാനിലെ പാലി ജില്ലയിലെ ബാലി താലൂക്കിലുള്ള ബേദൽ ഗ്രാമത്തിലാണ് ജനിച്ചത്. രാജസ്ഥാൻ സർവകലാശാലയിൽ നിന്ന് ബിരുദം നേടിയ ശേഷം ആർ.എസ്.എസ്. പ്രചാരകനായാണ് പൊതുജീവിതത്തിലേക്ക് പ്രവേശിച്ചത്. തുടർന്ന് ബി.ജെ.പി.യുടെ ഗുജറാത്ത് സംസ്ഥാന ചുമതലയുള്ള ജനറൽ സെക്രട്ടറിയായും രാജസ്ഥാനിൽ നിന്നുള്ള രാജ്യസഭാംഗമായും അദ്ദേഹം പ്രവർത്തിച്ചിട്ടുണ്ട്.
