ടാറ്റ മോട്ടോഴ്‌സിന്റെ ജനപ്രിയ എസ്‌യുവിയായ നെക്‌സോണിന്റെ അടുത്ത തലമുറ (Next-Gen) മോഡലിന്റെ പരീക്ഷണ ഓട്ടങ്ങൾ അതിവേഗം പുരോഗമിക്കുന്നു. പൂർണമായും മറച്ച നിലയിൽ റോഡുകളിൽ കണ്ടെത്തിയ ടെസ്റ്റ് മോഡലുകളുടെ ചിത്രങ്ങൾ വാഹനത്തിന്റെ ഡിസൈനിലുള്ള പ്രധാന മാറ്റങ്ങളിലേക്ക് വിരൽചൂണ്ടുന്നു. നിലവിലെ കൂപ്പെ ശൈലിയിൽ നിന്ന് മാറി കൂടുതൽ നേരായതും ബോക്‌സിയുമായ രൂപകൽപ്പനയിലായിരിക്കും പുതിയ നെക്‌സോൺ വിപണിയിലെത്തുക. 2027-ഓടെ ഈ വാഹനം നിരത്തിലെത്തുമെന്നാണ് റിപ്പോർട്ടുകൾ സൂചിപ്പിക്കുന്നത്.
പുതിയ ഡിസൈൻ മാറ്റങ്ങൾ വാഹനത്തിന്റെ സൈഡ് പ്രൊഫൈലിലും പിൻഭാഗത്തും കൂടുതൽ ദൃശ്യമാണ്. മേൽക്കൂര കൂടുതൽ പരന്നതും പിൻഭാഗം ലംബമായ രൂപത്തിലുമായതിനാൽ പിൻസീറ്റ് യാത്രക്കാർക്ക് മികച്ച ഹെഡ്‌റൂമും വലിയ ബൂട്ട് സ്‌പേസും ലഭിക്കാൻ ഇത് സഹായിക്കും. ഒപ്പം ഉയർന്ന സ്ഥാനത്ത് നൽകിയിരിക്കുന്ന ടെയിൽലൈറ്റുകൾ, വലിയ വിൻഡ്‌സ്‌ക്രീൻ, റിയർ വൈപ്പർ, റൂഫ് സ്‌പോയിലർ എന്നിവയും പിൻഭാഗത്തെ ആകർഷകമാക്കുന്നു. ഇതിനുപുറമേ, ഇന്ധന ഫില്ലർ ക്യാപ്പിന്റെ സ്ഥാനം ഡോർ ഹാൻഡിലിനോട് ഒരേ നിരയിലേക്ക് ഉയർത്തിയതും ശ്രദ്ധേയമായ ഒരു മാറ്റമാണ്.
പെട്രോൾ, ഡീസൽ, സി.എൻ.ജി, ഇലക്ട്രിക് (EV) പതിപ്പുകളിൽ പുതിയ മോഡലും ലഭ്യമാകുമെന്നാണ് പ്രതീക്ഷിക്കുന്നത്. നിലവിലെ 1.2 ലിറ്റർ ടർബോ പെട്രോൾ, 1.5 ലിറ്റർ ഡീസൽ എഞ്ചിനുകൾ തന്നെയാണ് വാഹനത്തിന് കരുത്തേകുക. ഔദ്യോഗിക ഫീച്ചറുകളും എഞ്ചിൻ വിവരങ്ങളും ടാറ്റ മോട്ടോഴ്‌സ് ഇതുവരെ പുറത്തുവിട്ടിട്ടില്ലെങ്കിലും, വിപണിയിലെത്തുമ്പോൾ ഹ്യുണ്ടായി വെന്യു, മാരുതി ബ്രെസ്സ, കിയ സോനെറ്റ്, മഹീന്ദ്ര XUV 3XO തുടങ്ങിയ മുൻനിര എസ്‌യുവികളുമായിട്ടായിരിക്കും പുതിയ നെക്‌സോണിന്റെ മത്സരം.
