തിരുവനന്തപുരം: കായികമേഖലയിൽ സമഗ്രമായ മാറ്റങ്ങൾ ലക്ഷ്യമിട്ടുള്ള പുതിയ കായിക ബിൽ നാളെ നിയമസഭയിൽ അവതരിപ്പിക്കുമെന്ന് കായിക വകുപ്പ് മന്ത്രി ഒ.ജെ. ജനീഷ്. കായികരംഗത്തെ പുരോഗതിക്കായി യാതൊരു വിട്ടുവീഴ്ചയുമില്ലാതെ മുന്നോട്ടുപോകുമെന്നും, സർക്കാരിന്റെ പരിധികൾക്കുള്ളിൽ നിന്നുകൊണ്ട് കായികതാരങ്ങൾക്ക് നൽകാവുന്ന പരമാവധി പിന്തുണ നൽകാൻ സംസ്ഥാന സർക്കാർ ഒപ്പമുണ്ടാകുമെന്നും മന്ത്രി കൂട്ടിച്ചേർത്തു.
കായികതാരങ്ങൾ നേരിടുന്ന തൊഴിൽ പ്രതിസന്ധിക്ക് വേഗത്തിൽ പരിഹാരം കാണുമെന്നും അദ്ദേഹം ഉറപ്പുനൽകി. കായികപ്രതിഭകൾക്ക് എത്രയും പെട്ടെന്ന് ജോലി നൽകുന്നതിനുള്ള എല്ലാ സജ്ജീകരണങ്ങളും സംസ്ഥാന സർക്കാരിന്റെ ഭാഗത്തുനിന്നും ഉണ്ടാകുമെന്നും സർക്കാർ പൂർണ്ണമായും കായികതാരങ്ങൾക്കൊപ്പം നിലകൊള്ളുമെന്നും മന്ത്രി വ്യക്തമാക്കി.
സംസ്ഥാന കായിക ദിനാഘോഷങ്ങളുടെ ഭാഗമായി തിരുവനന്തപുരത്തെ അപ്പോളോ ഡിമോറോ ഹോട്ടലിൽ സംഘടിപ്പിച്ച ചടങ്ങ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. മുൻ ഇന്ത്യൻ ഫുട്ബോൾ താരം ഐ.എം. വിജയൻ ഉൾപ്പെടെയുള്ള കായികരംഗത്തെ പ്രമുഖർ ചടങ്ങിൽ പങ്കെടുത്തു.
