ആഡംബര വാഹന നിർമ്മാതാക്കളായ മെഴ്സിഡീസ് ബെൻസ്, ഇന്ത്യയിലെ തങ്ങളുടെ ആദ്യ ഇലക്ട്രിഫൈഡ് മോഡലായ മേയ്ബാക്ക് S 580e (Maybach S 580e) വിപണിയിൽ അവതരിപ്പിച്ചു. മേയ്ബാക്കിന്റെ പാരമ്പര്യ ആഡംബരവും പ്ലഗ്-ഇൻ ഹൈബ്രിഡ് സാങ്കേതികവിദ്യയും സമന്വയിപ്പിച്ചെത്തുന്ന ഈ എക്സ്ക്ലൂസീവ് മോഡലിന് ₹3.35 കോടിയാണ് (എക്സ്-ഷോറൂം) വില. ആദ്യഘട്ടത്തിൽ 30 യൂണിറ്റുകൾ മാത്രമാണ് ഇന്ത്യയിൽ വിൽപ്പനയ്‌ക്കായി എത്തിക്കുന്നത്.
കരുത്തുറ്റ എൻജിനും പെർഫോമൻസും: 3.0 ലിറ്റർ പെട്രോൾ എൻജിനും ഇലക്ട്രിക് മോട്ടോറും ചേർന്ന പ്ലഗ്-ഇൻ ഹൈബ്രിഡ് പവർട്രെയിനാണ് വാഹനത്തിന്റെ പ്രധാന ആകർഷണം. 4MATIC ഓൾ-വീൽ ഡ്രൈവ് സിസ്റ്റവുമായി ചേരുന്ന എൻജിൻ സംയുക്തമായി 585 എച്ച്.പി കരുത്തും 750 എൻ.എം ടോർക്കും ഉത്പാദിപ്പിക്കും. 9G-TRONIC ഓട്ടമാറ്റിക് ഗിയർബോക്‌സാണ് വാഹനത്തിലുള്ളത്. കേവലം 4.8 സെക്കൻഡ് കൊണ്ട് പൂജ്യത്തിൽ നിന്ന് 100 കിലോമീറ്റർ വേഗത കൈവരിക്കാൻ ഈ വാഹനത്തിന് സാധിക്കും. മണിക്കൂറിൽ 250 കിലോമീറ്ററാണ് പരമാവധി വേഗത. ലിറ്ററിന് 34.48 കിലോമീറ്ററാണ് കമ്പനി അവകാശപ്പെടുന്ന ഇന്ധനക്ഷമത.
98 കിലോമീറ്റർ ഇലക്ട്രിക് റേഞ്ച്: 22 kWh ശേഷിയുള്ള ബാറ്ററിയാണ് S 580e-യിൽ നൽകിയിരിക്കുന്നത്. ഒറ്റ ചാർജിൽ WLTP മാനദണ്ഡപ്രകാരം 98 കിലോമീറ്റർ വരെ ഇലക്ട്രിക് മോഡിൽ മാത്രം സഞ്ചരിക്കാം. ഇലക്ട്രിക് മോഡിൽ പരമാവധി 140 കിലോമീറ്റർ വരെ വേഗത കൈവരിക്കാനാകും. 11 kW AC, 60 kW DC ഫാസ്റ്റ് ചാർജിങ് സംവിധാനങ്ങൾ വാഹനം പിന്തുണയ്ക്കും. വാഹനത്തിനൊപ്പം ഹോം ചാർജറും കമ്പനി ലഭ്യമാക്കുന്നുണ്ട്.
രാജകീയ ഇന്റീരിയറും സവിശേഷതകളും: നാല് സീറ്റുകളുള്ള ഫസ്റ്റ്-ക്ലാസ് റിയർ കംപാർട്ട്‌മെന്റാണ് ഉള്ളിലുള്ളത്. എക്സിക്യൂട്ടീവ് പിൻസീറ്റുകൾ, ഫുൾ-ലെങ്ത് ബിസിനസ് സെന്റർ കൺസോൾ, വയർലെസ് ചാർജിങ്, താപനില നിയന്ത്രിക്കാവുന്ന കപ്പ് ഹോൾഡറുകൾ എന്നിവ അകത്തളത്തെ സമ്പന്നമാക്കുന്നു. റിയർ കംഫർട്ട് പാക്കേജ് പ്ലസിലൂടെ ക്ലൈമറ്റൈസ്ഡ് സീറ്റുകൾ, ആംബിയന്റ് ലൈറ്റിങ്, റിയർ MBUX നിയന്ത്രണങ്ങൾ എന്നിവയും നൽകിയിട്ടുണ്ട്.
മ്യൂസിക് സിസ്റ്റവും സുരക്ഷയും: 31 സ്പീക്കറുകളും എട്ട് എക്സൈറ്ററുകളും അടങ്ങിയ 1,610 വാട്ട് ഔട്ട്പുട്ടുള്ള ബേംസ്റ്റർ (Burmester) 4D ഹൈ-എൻഡ് സറൗണ്ട് സിസ്റ്റമാണ് വിനോദത്തിനായി സജ്ജീകരിച്ചിരിക്കുന്നത്. ഡോൾബി ആറ്റംസ് വയർലെസ് ഹെഡ്‌ഫോണുകളും ലഭ്യമാണ്. സുരക്ഷയ്ക്കായി 15 എയർബാഗുകൾ, പ്രീ-സേഫ് സിസ്റ്റം, ഗാർഡ് 360 വെഹിക്കിൾ പ്രൊട്ടക്ഷൻ പ്ലസ്, അഡാസ് ലെവൽ 2 സവിശേഷതകൾ എന്നിവ നൽകിയിട്ടുണ്ട്. ക്ലൗഡ് ബേസ്ഡ് എയർമാറ്റിക് എയർ സസ്പെൻഷൻ, 10 ഡിഗ്രി റിയർ ആക്സിൽ സ്റ്റിയറിങ് എന്നിവ മികച്ച യാത്രാസുഖം ഉറപ്പുനൽകുന്നു.
