തിരുവനന്തപുരം: കേരളത്തിന്റെ പുതിയ മുഖ്യമന്ത്രിയെ തിരഞ്ഞെടുക്കാനുള്ള പൂര്‍ണ്ണ ചുമതല കോണ്‍ഗ്രസ് ഹൈക്കമാന്‍ഡിന് വിട്ടു. ഇന്ന് ചേര്‍ന്ന കോണ്‍ഗ്രസ് നിയമസഭാ കക്ഷി യോഗത്തിലാണ് എഐസിസി അധ്യക്ഷന്‍ മല്ലികാര്‍ജുന്‍ ഖാര്‍ഗെയെ അന്തിമ തീരുമാനമെടുക്കാന്‍ ചുമതലപ്പെടുത്തിക്കൊണ്ടുള്ള പ്രമേയം പാസാക്കിയത്.
കെപിസിസി അധ്യക്ഷന്‍ സണ്ണി ജോസഫ് അവതരിപ്പിച്ച പ്രമേയത്തെ പ്രതിപക്ഷ നേതാവ് വി.ഡി. സതീശന്‍ പിന്താങ്ങി. ഇതോടെ മുഖ്യമന്ത്രിയെ സംബന്ധിച്ച അന്തിമ തീരുമാനം ദില്ലിയിലേക്ക് നീങ്ങി. ഹൈക്കമാന്‍ഡ് നിരീക്ഷകരായ അജയ് മാക്കന്‍, മുകുള്‍ വാസ്നിക് എന്നിവരുടെ സാന്നിധ്യത്തിലായിരുന്നു യോഗം ചേര്‍ന്നത്. പ്രമേയം പാസാക്കിയതിന് പിന്നാലെ നിരീക്ഷകരും ദീപാ ദാസ് മുന്‍ഷിയും ഓരോ എംഎല്‍എമാരുമായും വ്യക്തിഗത കൂടിക്കാഴ്ച ആരംഭിച്ചു.
എംഎല്‍എമാര്‍ ആരെ പിന്തുണയ്ക്കുന്നു എന്നതിനെക്കുറിച്ച് നിരീക്ഷകര്‍ ഓരോരുത്തരോടും രഹസ്യമായി അഭിപ്രായം തേടും. ഈ കൂടിക്കാഴ്ചയിലെ റിപ്പോര്‍ട്ട് ഉടന്‍ തന്നെ ഹൈക്കമാന്‍ഡിന് സമര്‍പ്പിക്കും. ഇതിനുശേഷമായിരിക്കും കേരളത്തിന്റെ പുതിയ മുഖ്യമന്ത്രി ആരെന്ന കാര്യത്തില്‍ ഔദ്യോഗിക പ്രഖ്യാപനം ഉണ്ടാകുക.
മുഖ്യമന്ത്രി പ്രഖ്യാപനം: തീരുമാനം ഹൈക്കമാന്‍ഡിന് വിട്ടു; നിര്‍ണ്ണായക പ്രമേയം പാസാക്കി കോണ്‍ഗ്രസ് നിയമസഭാ കക്ഷി യോഗം
Jaihind TV News Report
Jaihind TV Web Desk
Updated Oct 12, 2026
2 min read
191 reads
