ബ്രിട്ടനെ കീഴടക്കിയ ചൈനീസ് കാർ ഇന്ത്യയിലേക്ക് എത്തുന്നതിന്റെ വിശേഷങ്ങളിലേക്ക് വരുമ്പോൾ, ഏതാനും വർഷങ്ങൾക്ക് മുൻപ് സ്വപ്നം പോലും കാണാൻ സാധിക്കാത്ത നേട്ടങ്ങളാണ് യൂറോപ്പിൽ ചൈനീസ് വാഹന നിർമാതാക്കൾ സ്വന്തമാക്കിക്കൊണ്ടിരിക്കുന്നത്. ഇതിന്റെ ഏറ്റവും വലിയ ഉദാഹരണമാണ് സെപ്റ്റംബറിൽ 10,913 റജിസ്‌ട്രേഷനുകളുമായി ബ്രിട്ടനിൽ ഏറ്റവും കൂടുതൽ വിറ്റഴിക്കപ്പെട്ട കാറായി ജെയ്കൂ 7 മാറിയത്. ടെസ്‌ല മോഡൽ 3, ഫോർഡ് പ്യൂമ, കിയ സ്പോർട്ടേജ് തുടങ്ങിയ ജനപ്രിയ മോഡലുകളെ പിന്നിലാക്കിയാണ് ജെയ്കൂ ഈ നേട്ടം കൈവരിച്ചത്.
ഇത് യാദൃശ്ചികമല്ലെന്ന് തെളിയിക്കുന്നതാണ് യുകെയിലെ മറ്റ് കണക്കുകൾ. നേരത്തെ 2026 മാർച്ചിലും 10,064 യൂണിറ്റുകളുടെ വിൽപ്പനയുമായി ജെയ്കൂ 7 യുകെയിൽ ഒന്നാമതെത്തിയിരുന്നു. സെപ്റ്റംബർ അവസാനിച്ചപ്പോഴേക്കും 2026 ലെ ആകെ വിൽപ്പന 39,473 യൂണിറ്റുകളിലെത്തി. ഇതോടെ പ്യൂമയ്ക്ക് പിന്നിൽ ഈ വർഷം യുകെയിൽ ഏറ്റവും കൂടുതൽ വിറ്റഴിച്ച രണ്ടാമത്തെ കാറെന്ന നേട്ടവും ജെയ്കൂ 7 സ്വന്തമാക്കി.
ബ്രിട്ടീഷ് വിജയത്തിന് പിന്നാലെ ജെയ്കൂ 7 ഇനി ഇന്ത്യൻ വിപണി ലക്ഷ്യമിടുകയാണ്. ഇന്ത്യയിലെ റോഡുകളിൽ വാഹനം പരീക്ഷണയോട്ടം നടത്തുന്നതിന്റെ ദൃശ്യങ്ങൾ ഇതിനോടകം പുറത്തുവന്നു കഴിഞ്ഞു. ജെഎസ്ഡബ്ല്യു മോട്ടോഴ്‌സുമായി ചേർന്ന് ചെറി ഗ്രൂപ്പാണ് ഈ ആഡംബര എസ് യുവി ഇന്ത്യയിലെത്തിക്കുന്നത്. ആദ്യ ഘട്ടത്തിൽ തന്നെ ഇന്ത്യൻ നിരത്തുകളിലെത്താൻ സാധ്യതയുള്ള ഇതിന്റെ പ്ലഗ്-ഇൻ ഹൈബ്രിഡ് പതിപ്പായിരിക്കും പ്രധാന ആകർഷണം.
ചെറി ഗ്രൂപ്പിനു കീഴിലുള്ള ആഡംബര കാർ വിഭാഗമാണ് ജെയ്കൂ. ലാൻഡ് റോവർ മോഡലുകളെ ഓർമിപ്പിക്കുന്ന ബോക്സി ഡിസൈനും കരുത്തുറ്റ എക്സ്റ്റീരിയർ ലുക്കുമാണ് ഈ മിഡ്-സൈസ് എസ്‌യുവിയുടെ പ്രധാന പ്രത്യേകത. വലിപ്പത്തിൽ ടാറ്റ ഹാരിയർ, ജീപ്പ് കോംപസ് എന്നിവയോട് ചേർന്നുനിൽക്കുന്ന ഈ വാഹനത്തിൽ വലിയ വെർട്ടിക്കൽ ടച്ച്‌സ്‌ക്രീൻ ഇൻഫോടെയിൻമെന്റ് സിസ്റ്റം, ഡിജിറ്റൽ ഇൻസ്ട്രുമെന്റ് ക്ലസ്റ്റർ, എഡാസ് സുരക്ഷാ ഫീച്ചറുകൾ എന്നിവയും ഉൾപ്പെടുത്തിയിട്ടുണ്ട്.
യുകെയിൽ പെട്രോൾ, ഹൈബ്രിഡ്, പ്ലഗ്-ഇൻ ഹൈബ്രിഡ് പതിപ്പുകളിൽ എത്തുന്ന ഈ വാഹനത്തിന്റെ വില ഏകദേശം 32.2 ലക്ഷം രൂപ മുതൽ 40.3 ലക്ഷം രൂപ വരെയാണ്. ഇന്ത്യയിലേക്ക് കൂടുതൽ അനുയോജ്യമായത് ജെയ്കൂ ജെ7 എസ്എച്ച്എസ് പ്ലഗ്-ഇൻ ഹൈബ്രിഡ് പതിപ്പാണ്. 18.3 മുതൽ 18.5 കിലോവാട്ട് ബാറ്ററി പാക്കും 1.5 ലീറ്റർ ടർബോ പെട്രോൾ എൻജിനും ഇലക്ട്രിക് മോട്ടാറും ചേരുന്നതാണ് ഇതിന്റെ ഹൈബ്രിഡ് സംവിധാനം. പൂർണമായും വൈദ്യുതിയിൽ മാത്രം 90 മുതൽ 106 കിലോമീറ്റർ വരെ സഞ്ചരിക്കാം. പെട്രോളും കൂടി ചേരുമ്പോൾ ആകെ റേഞ്ച് 1,200 കിലോമീറ്ററിലേറെ വരുമെന്നാണ് കമ്പനിയുടെ അവകാശവാദം. ഡിസി ഫാസ്റ്റ് ചാർജിങ് സൗകര്യവുമുണ്ട്.
ബ്രിട്ടനിൽ വിജയം ആവർത്തിച്ചെങ്കിലും ഇന്ത്യയിൽ ജെഎസ്ഡബ്ല്യു മോട്ടോഴ്സിന് വലിയ വെല്ലുവിളികളാണുള്ളത്. പുതിയൊരു ബ്രാൻഡ് ഇമേജ് നിർമിക്കുന്നതിനൊപ്പം ശക്തമായ വിൽപ്പന, വിൽപ്പനാനന്തര സേവന ശൃംഖല ഒരുക്കുകയെന്നത് ചെറിയ കാര്യമല്ല. ഒപ്പം റീസെയിൽ വാല്യുവിലുള്ള ഉപഭോക്താക്കളുടെ ആശങ്ക പരിഹരിക്കുകയെന്നതും കമ്പനിക്ക് മുന്നിലുള്ള പ്രധാന കടമ്പയാണ്.
