ന്യൂഡൽഹി: ഹൈജാക്ക് ഭീഷണിയെ തുടർന്നുണ്ടായ സുരക്ഷാ മുന്നറിയിപ്പിന് പിന്നാലെ ഫ്രാങ്ക്ഫട്ടിൽ നിന്ന് ഡൽഹിയിലേക്ക് വരികയായിരുന്ന എയർ ഇന്ത്യ വിമാനം ജയ്പൂർ വിമാനത്താവളത്തിൽ അടിയന്തരമായി ഇറക്കി. എയർ ഇന്ത്യയുടെ AI-2030 വിമാനമാണ് ജയ്പൂർ വിമാനത്താവളത്തിൽ സുരക്ഷിതമായി ഇറക്കിയത്. തുടർന്ന് വിമാനം പ്രത്യേക ഐസൊലേഷൻ ബേയിലേക്ക് മാറ്റി.
അടിയന്തര ലാന്‍ഡിംഗ് സംബന്ധിച്ച് വിമാനത്താവള അധികൃതർ സ്ഥിരീകരിച്ചതായി മാൽവിയ നഗർ അസിസ്റ്റന്റ് പൊലീസ് കമ്മീഷണർ ശിവ് ദയാൽ മാധ്യമങ്ങളെ അറിയിച്ചു. തുടർന്ന് വിമാനത്തിൽ പൊലീസ്, സുരക്ഷാ ഉദ്യോഗസ്ഥർ പരിശോധന നടത്തി.
ലഭ്യമായ വിവരം അനുസരിച്ച് വിമാനം മുംബൈ ഫ്ലൈറ്റ് ഇൻഫർമേഷൻ റീജിയണിൽ (FIR) സഞ്ചരിക്കുമ്പോൾ പൈലറ്റ്, ഹൈജാക്ക് അല്ലെങ്കിൽ നിയമവിരുദ്ധ ഇടപെടൽ സൂചിപ്പിക്കുന്ന ‘സ്ക്വോക്ക് കോഡ് 7500’ മുന്നറിയിപ്പ് നല്‍കിയതാണ് റിപ്പോർട്ട്. ഇതിന് പിന്നാലെയാണ് വിമാനം ജയ്പൂരിലേക്ക് തിരിച്ചുവിട്ടത്.
വിമാനം സുരക്ഷിതമായി ഇറങ്ങിയതിനു പിന്നാലെ പൈലറ്റുമാരെയും യാത്രക്കാരെയും സുരക്ഷാ ഉദ്യോഗസ്ഥരുടെ മേൽനോട്ടത്തിൽ പുറത്തിറക്കി. യാത്രക്കാരെയും അവരുടെ ബാഗേജുകളും വിശദമായ സുരക്ഷാ പരിശോധനയ്ക്ക് വിധേയമാക്കി.
https://x.com/ANI/status/2110253335966306763/video/1
