കേരളത്തിന്റെ 50 വർഷത്തെ ചരിത്രത്തിൽ പേ കമ്മീഷൻ റിപ്പോർട്ട് കൈപ്പറ്റിയിട്ടും അത് നടപ്പിലാക്കാത്ത ഏക സർക്കാർ മുൻ പിണറായി സർക്കാരാണെന്ന് മുഖ്യമന്ത്രി വി.ഡി. സതീശൻ നിയമസഭയിൽ കുറ്റപ്പെടുത്തി. സർക്കാർ ജീവനക്കാരുടെ ശമ്പള പരിഷ്കരണത്തിൽ കഴിഞ്ഞ സർക്കാർ മനപ്പൂർവ്വം കാലതാമസം വരുത്തുകയായിരുന്നു. ലീവ് സറണ്ടർ ആനുകൂല്യങ്ങൾ തടഞ്ഞുവെക്കാൻ ഏറ്റവും കൂടുതൽ ഉത്തരവുകൾ ഇറക്കിയതും മുൻ സർക്കാരാണ്. ജീവനക്കാരുടെ 58,000 കോടി രൂപയുടെ ഭീമമായ കുടിശ്ശിക ബാധ്യത യു.ഡി.എഫ് സർക്കാരിന്റെ തലയിൽ വച്ചാണ് പിണറായി വിജയൻ അധികാരമൊഴിഞ്ഞതെന്നും, നിലവിലെ ധനസ്ഥിതി പരിശോധിച്ച് ശമ്പള പരിഷ്കരണത്തിൽ ആവശ്യമായ നടപടികൾ യു.ഡി.എഫ് സർക്കാർ സ്വീകരിക്കുമെന്നും മുഖ്യമന്ത്രി വ്യക്തമാക്കി.
കേരളത്തിലെ സ്ത്രീകളോടുള്ള സർക്കാരിന്റെ ആദരവിന്റെ പ്രതീകമാണ് 'പ്രിയദർശിനി സൗജന്യ യാത്ര' പദ്ധതി. സ്ത്രീകളെ സമൂഹത്തിന്റെ മുഖ്യധാരയിലേക്ക് കൊണ്ടുവരുന്നതിനായി നിരവധി വിപ്ലവകരമായ പദ്ധതികൾ സമയബന്ധിതമായി സർക്കാർ ഇനിയും നടപ്പിലാക്കും. സ്ത്രീകൾക്ക് സാമ്പത്തിക സ്വയംപര്യാപ്തത ഉറപ്പുവരുത്തുകയും അവരെ സ്വന്തം കാലിൽ നിലനിൽക്കാൻ പ്രാപ്തരാക്കുകയുമാണ് സർക്കാരിന്റെ പ്രഖ്യാപിത ലക്ഷ്യമെന്ന് മുഖ്യമന്ത്രി സഭയെ അറിയിച്ചു.
കഴിഞ്ഞ എൽ.ഡി.എഫ് സർക്കാരിന്റെ കാലത്ത് നൽകിയിരുന്ന സ്ത്രീ സുരക്ഷാ പെൻഷന്റെ ഗുണഭോക്താക്കളെ തിരഞ്ഞെടുത്തതിൽ വ്യാപകമായ പരാതികളും ക്രമക്കേടുകളും നിലനിൽക്കുന്നുണ്ടെന്ന് മുഖ്യമന്ത്രി പറഞ്ഞു. ഈ പരാതികളെല്ലാം സർക്കാർ വിശദമായി പരിശോധിക്കുമെന്നും, അർഹരായവർക്ക് കൃത്യമായി സഹായം ലഭിക്കുന്ന രീതിയിൽ പദ്ധതി എങ്ങനെ പുനഃസംഘടിപ്പിച്ചു നടപ്പിലാക്കണമെന്ന് ആലോചിക്കുമെന്നും അദ്ദേഹം വ്യക്തമാക്കി.
