ന്യൂഡൽഹി: ജീവനക്കാരുടെ പണിമുടക്കിനെ തുടർന്ന് രാജ്യത്ത് തുടർച്ചയായി അഞ്ച് ദിവസം ബാങ്കുകൾ അടഞ്ഞുകിടക്കുന്നത് ഒഴിവാക്കാൻ ഞായറാഴ്ച (സെപ്റ്റംബർ 27) ശാഖകൾ തുറന്നുപ്രവർത്തിക്കുന്നതിൽ ആശയക്കുഴപ്പം രൂക്ഷമാകുന്നു. ഇൻഡസ്ട്രിയൽ ഡിസ്പ്യൂട്ട്സ് ആക്ട് (IDA) പ്രകാരം ഞായറാഴ്ച അവധിദിനമായതിനാൽ ജീവനക്കാർ ജോലിക്ക് റിപ്പോർട്ട് ചെയ്യരുതെന്ന് ഓൾ ഇന്ത്യ ബാങ്ക് ഓഫിസേഴ്സ് അസോസിയേഷൻ (AIBOA) ആവശ്യപ്പെട്ടു. എന്നാൽ ജനങ്ങളുടെ ബുദ്ധിമുട്ട് ഒഴിവാക്കാൻ ഞായറാഴ്ച പ്രവർത്തിക്കാൻ റിസർവ് ബാങ്ക് അനുമതി നൽകിയതിനെ തുടർന്ന് എസ്.ബി.ഐ ഉൾപ്പെടെയുള്ള ബാങ്കുകൾ തുറന്നുപ്രവർത്തിക്കുമെന്ന് അറിയിച്ചിട്ടുണ്ട്.
ആഴ്ചയിൽ പ്രവൃത്തിദിനം അഞ്ചാക്കി ചുരുക്കുക, പെർഫോമൻസ് ലിങ്ക്ഡ് ഇൻസെന്റീവ് (PLI) സ്കീമിൽ മാറ്റം വരുത്തുക തുടങ്ങിയ ആവശ്യങ്ങളുന്നയിച്ച് സെപ്റ്റംബർ 28, 29, 30 തീയതികളിലാണ് പണിമുടക്ക്. എട്ട് ലക്ഷത്തോളം അംഗങ്ങളുള്ള 7 ബാങ്ക് യൂണിയനുകളുടെ സംയുക്ത സംഘടനയായ യുണൈറ്റഡ് ഫോറം ഓഫ് ബാങ്ക് യൂണിയൻസ് (UFBU) ആണ് സമരത്തിന് ആഹ്വാനം ചെയ്തിരിക്കുന്നത്. സെപ്റ്റംബർ 26 ശനിയും 27 ഞായറും കൂടിയാകുന്നതോടെ തുടർച്ചയായി 5 ദിവസം ബാങ്കിംഗ് സേവനങ്ങൾ തടസ്സപ്പെടും. ഇത് ചെക്ക് ക്ലിയറൻസിനെയും എ.ടി.എം പ്രവർത്തനങ്ങളെയും ബാധിക്കുമെന്നതിനാലാണ് ഞായറാഴ്ച ബാങ്കുകൾ തുറക്കാൻ റിസർവ് ബാങ്ക് അനുമതി നൽകിയത്.
ഞായറാഴ്ച പ്രവൃത്തിദിനമാക്കിയത് നെഗോഷ്യബിൾ ഇൻസ്ട്രുമെന്റ്സ് ആക്ട് (NIA) പ്രകാരമാണോ എന്ന് വ്യക്തമല്ലാത്തതാണ് ആശയക്കുഴപ്പത്തിന് കാരണം. ജീവനക്കാർ ജോലിയിൽ പ്രവേശിക്കുന്നത് സംബന്ധിച്ച് അന്തിമ തീരുമാനം എടുത്തിട്ടില്ലെന്ന് യു.ബി.എഫ്.യു ഭാരവാഹികൾ വ്യക്തമാക്കി. അതേസമയം, പണിമുടക്ക് മുന്നിൽ കണ്ട് കേന്ദ്രസർക്കാർ ജീവനക്കാരുടെ ശമ്പളവും പെൻഷനും നേരത്തെ വിതരണം ചെയ്യാൻ നിർദ്ദേശം നൽകിയിട്ടുണ്ട്. കേരളത്തിൽ ട്രഷറികളിൽ സാധാരണ സൂക്ഷിക്കുന്ന പണത്തിന്റെ ഇരട്ടി കൈവശം വെക്കാൻ പ്രത്യേക അനുമതി നൽകി.
പ്രവൃത്തിദിനം അഞ്ചാക്കുന്നതിൽ ബാങ്ക് മാനേജ്മെന്റുകളുടെ സംഘടനയായ ഐ.ബി.എ (IBA) അനുകൂല നിലപാട് എടുത്തെങ്കിലും രണ്ടു വർഷമായി കേന്ദ്ര സർക്കാർ തീരുമാനമെടുക്കാതെ നീട്ടിക്കൊണ്ടുപോകുകയാണ്. മുൻപ് നടത്തിയ ചർച്ചകൾ പരാജയപ്പെട്ട സാഹചര്യത്തിൽ, ആവശ്യങ്ങൾ അംഗീകരിച്ചില്ലെങ്കിൽ ഒക്ടോബർ മുതൽ അനിശ്ചിതകാല പണിമുടക്കിലേക്ക് കടക്കുമെന്നാണ് ബാങ്ക് യൂണിയനുകളുടെ മുന്നറിയിപ്പ്.
