റോഡുകൾ കീഴടക്കാൻ അപ്രീലിയ എസ്എക്‌സ്ആർ ജിടി: രണ്ട് വേരിയന്റുകളിൽ പുതിയ സ്‌കൂട്ടറുകൾ വിപണിയിലേക്ക്

പ്രമുഖ ഇരുചക്രവാഹന നിർമ്മാതാക്കളായ അപ്രീലിയ, ജനപ്രിയ എസ്ആർ സീരീസിന്റെ പ്ലാറ്റ്‌ഫോമിൽ പുതിയ എസ്എക്‌സ്ആർ ജിടി (SXR GT) മാക്സി-സ്‌കൂട്ടർ ശ്രേണി വിപണിയിൽ അവതരിപ്പിച്ചു. എസ്എക്‌സ്ആർ ജിടി 125, എസ്എക്‌സ്ആർ ജിടി 175 എന്നീ രണ്ടു വേരിയന്റുകളിലാണ് ഈ മോഡലുകൾ എത്തുന്നത്. രാജ്യത്തുടനീളമുള്ള അപ്രീലിയ ഡീലർഷിപ്പുകൾ വഴി ഇതിന്റെ ബുക്കിങ് ആരംഭിച്ചിട്ടുണ്ട്.

മെച്ചപ്പെടുത്തിയ എഞ്ചിൻ കരുത്തും മികച്ച ബ്രേക്കിങ് ഫീച്ചറുകളുമാണ് ഈ മോഡലുകളുടെ പ്രധാന ആകർഷണം. ജിടി 175 വേരിയന്റിൽ 174.7 സിസി എച്ച്പി-ഇ സിംഗിൾ-സിലിണ്ടർ എയർ-കൂൾഡ് എഞ്ചിനാണുള്ളത്. ഇത് 7,200 ആർപിഎമ്മിൽ 13 ബിഎച്ച്പി കരുത്തും 6,000 ആർപിഎമ്മിൽ 14.14 എൻഎം ടോർക്കും ഉൽപ്പാദിപ്പിക്കുന്നു. ജിടി 125 വേരിയന്റിൽ 124.5 സിസി എഞ്ചിനാണ് നൽകിയിരിക്കുന്നത്. ഇത് 7,400 ആർപിഎമ്മിൽ 10.5 ബിഎച്ച്പി കരുത്തും 6,200 ആർപിഎമ്മിൽ 10.4 എൻഎം ടോർക്കും വാഗ്ദാനം ചെയ്യുന്നു. രണ്ടു മോഡലുകളുടെയും മുന്നിൽ 220 എംഎം ഡിസ്‌‌ക് ബ്രേക്കും പിന്നിൽ 140 എംഎം ഡ്രം ബ്രേക്കുമാണുള്ളത്. സുരക്ഷയ്ക്കായി ജിടി 175-ൽ സിംഗിൾ ചാനൽ എബിഎസും (ABS) ജിടി 125-ൽ കോംബി ബ്രേക്ക് സിസ്റ്റവും (CBS) ഏർപ്പെടുത്തിയിട്ടുണ്ട്.

ഡിസൈനിലും കണക്റ്റിവിറ്റിയിലും പുത്തൻ സാങ്കേതികവിദ്യകളാണ് ഉൾപ്പെടുത്തിയിരിക്കുന്നത്. 14 ഇഞ്ച് വീലുകളും ട്രൈപോഡ് എൽഇഡി ഹെഡ്‌ലാമ്പും രണ്ടു മോഡലുകൾക്കുമുണ്ട്. ജിടി 175 വേരിയന്റിൽ ബ്ലൂടൂത്ത് സ്മാർട്ട്‌ഫോൺ കണക്റ്റിവിറ്റി, ടേൺ ബൈ ടേൺ നാവിഗേഷൻ, ഹാൻഡ്‌ലറിലെ കൺട്രോളുകൾ, ചൂടിൽ നിന്ന് സംരക്ഷണം നൽകുന്ന പുത്തൻ മഫ്‌ളർ എന്നിവ ഉൾപ്പെടുത്തിയ 5 ഇഞ്ച് ടിഎഫ്‌ടി ഡിസ്‌പ്ലേയാണുള്ളത്. എന്നാൽ ജിടി 125-ൽ 5 ഇഞ്ച് മോണോക്രോം എൽസിഡി ഇൻസ്ട്രുമെന്റ് ക്ലസ്റ്ററാണ് ക്രമീകരിച്ചിരിക്കുന്നത്. ആകർഷകമായ നിറങ്ങളിലും ഗ്രാഫിക്‌സിലുമാണ് ഇവ ലഭിക്കുക.