ന്യൂഡല്‍ഹി: അങ്കിത ഭണ്ഡാരിയുടെ മാതാപിതാക്കളെ ഡല്‍ഹിയിലെ ഇന്ത്യ ഗേറ്റിന് സമീപത്തുനിന്നും പോലീസ് കസ്റ്റഡിയില്‍ എടുത്ത നടപടിയില്‍ രൂക്ഷ വിമര്‍ശനവുമായി രാഹുല്‍ ഗാന്ധി. ദുഷ്യന്ത് ഗൗതമിനെ സിക്കിം ഗവര്‍ണറായി നിയമിക്കരുതെന്നും സി.ബി.ഐ അന്വേഷണം പൂര്‍ത്തിയാകുന്നതുവരെ കാത്തിരിക്കണമെന്നും ആവശ്യപ്പെട്ട് ശാന്തമായി സമരം ചെയ്യുകയായിരുന്ന മാതാപിതാക്കളെ പുലര്‍ച്ചെ നാല് മണിയോടെയാണ് പോലീസ് കസ്റ്റഡിയിലെടുത്തത്. ഇരകളുടെ ശബ്ദം അടിച്ചമര്‍ത്താനാണ് സര്‍ക്കാര്‍ ശ്രമിക്കുന്നതെന്ന് രാഹുല്‍ ഗാന്ധി കുറ്റപ്പെടുത്തി.
അന്വേഷണ ഫലം വരുന്നതിന് മുന്‍പ് നിയമനങ്ങള്‍ നടത്തുന്നതിലെ തിടുക്കത്തെ ചോദ്യം ചെയ്തതിനാണ് മാതാപിതാക്കളെ പാതിരാത്രിയില്‍ കസ്റ്റഡിയിലെടുത്തതെന്ന് രാഹുല്‍ ഗാന്ധി ചൂണ്ടിക്കാണിച്ചു. ദുഃഖഭാരത്താല്‍ തളര്‍ന്ന അവര്‍ അവിടെ യാതൊരുവിധ ശല്യവും ഉണ്ടാക്കിയിരുന്നില്ലെന്നും അദ്ദേഹം വ്യക്തമാക്കി. പ്രിയങ്ക ഗാന്ധിക്കൊപ്പം താന്‍ ഇന്നലെ ഇവരെ നേരിട്ട് കണ്ടിരുന്നുവെന്നും അദ്ദേഹം ഓര്‍മ്മിപ്പിച്ചു.
ചോദ്യങ്ങള്‍ ചോദിക്കാന്‍ ധൈര്യപ്പെടുന്നവരെ നീക്കം ചെയ്യുകയും ഇരകളുടെ ശബ്ദം അടിച്ചമര്‍ത്തുകയുമാണ് ഈ സര്‍ക്കാരിന്റെ രീതിയെന്ന് രാഹുല്‍ ഗാന്ധി വിമര്‍ശിച്ചു. എന്നാല്‍ നീതിക്കുവേണ്ടിയുള്ള പോരാട്ടം ഒരിക്കലും നിലച്ചുപോകില്ലെന്നും, അങ്കിത ഭണ്ഡാരിയുടെ കുടുംബത്തിന് നീതി ലഭിക്കുന്നത് വരെ കോണ്‍ഗ്രസ് പാര്‍ട്ടി അവര്‍ക്കൊപ്പം ശക്തമായി നിലകൊള്ളുമെന്നും അദ്ദേഹം കൂട്ടിച്ചേര്‍ത്തു.
ഇരകളുടെ ശബ്ദം അടിച്ചമര്‍ത്തുന്നു; അങ്കിത ഭണ്ഡാരിയുടെ മാതാപിതാക്കളെ കസ്റ്റഡിയിലെടുത്തതില്‍ രൂക്ഷവിമര്‍ശനവുമായി രാഹുല്‍ ഗാന്ധി
Jaihind TV News Report
Jaihind TV Web Desk
2 min read
2,217 reads
