ഗുവാഹത്തിയിലെ ഹോട്ടല്‍ വെടിവെപ്പില്‍ അഞ്ച് പേര്‍ കൊല്ലപ്പെട്ട സംഭവത്തില്‍ ബി.ജെ.പിക്കെതിരെ രൂക്ഷ വിമര്‍ശനവുമായി ആസാം കോണ്‍ഗ്രസ് പ്രസിഡന്റും എം.പിയുമായ ഗൗരവ് ഗൊഗോയ് രംഗത്ത്. വടക്കുകിഴക്കന്‍ സംസ്ഥാനങ്ങളില്‍ വര്‍ദ്ധിച്ചുവരുന്ന അക്രമങ്ങളും നിയമവിരുദ്ധ പ്രവര്‍ത്തനങ്ങളും ഭരണകക്ഷിയുടെ തെറ്റായ രാഷ്ട്രീയ നിയമനങ്ങളുടെ ഫലമാണെന്ന് അദ്ദേഹം ആരോപിച്ചു.
കൊല്ലപ്പെട്ടവരുടെ കുടുംബങ്ങള്‍ക്ക് അനുശോചനം രേഖപ്പെടുത്തിയ ഗൗരവ് ഗൊഗോയ്, ഗുവാഹത്തിയിലെ ക്രമസമാധാന തകര്‍ച്ചയിലും പൊതുസുരക്ഷയിലെ വീഴ്ചയിലും കടുത്ത ആശങ്ക പ്രകടിപ്പിച്ചു. വടക്കുകിഴക്കന്‍ സംസ്ഥാനങ്ങളില്‍ അധികാരികളെയും മന്ത്രിമാരെയും മുഖ്യമന്ത്രിമാരെയും നിയമിക്കുമ്പോള്‍ ബി.ജെ.പി ഗൗരവമായ പരിശോധന നടത്തിയിട്ടില്ലെന്നും, സംശയാസ്പദമായ പശ്ചാത്തലമുള്ള വ്യക്തികളെ ഉന്നത പദവികളില്‍ അവരോധിക്കുന്നത് സമൂഹത്തില്‍ അശാന്തി സൃഷ്ടിക്കുന്നുവെന്നും അദ്ദേഹം കുറ്റപ്പെടുത്തി. മണിപ്പൂര്‍, ആസാം, അരുണാചല്‍ പ്രദേശ് തുടങ്ങിയ സംസ്ഥാനങ്ങളില്‍ നിലനില്‍ക്കുന്ന രാഷ്ട്രീയ അസ്ഥിരതയും അക്രമങ്ങളും ഇതിന് തെളിവാണെന്നും അദ്ദേഹം പറഞ്ഞു.
തിങ്കളാഴ്ച രാത്രി ഗുവാഹത്തിയിലെ ഉലുബാരി ബോറ സര്‍വീസ് ഏരിയയിലുള്ള 'ഹോട്ടല്‍ ബിലാസ് ഇന്നി'ലുണ്ടായ വെടിവെപ്പില്‍ ഒരു കുടുംബത്തിലെ നാലുപേരുള്‍പ്പെടെ അഞ്ച് പേരാണ് കൊല്ലപ്പെട്ടത്. ഹോട്ടല്‍ ലീസിനെച്ചൊല്ലിയുള്ള തര്‍ക്കത്തെത്തുടര്‍ന്ന്, ഹോട്ടല്‍ ലീസിനെടുത്ത ഘനകാന്ത ഗൊഗോയ് എന്നയാളെ പോലീസ് മണിക്കൂറുകള്‍ക്കകം അറസ്റ്റ് ചെയ്തിരുന്നു.
ഇതിനുപുറമെ, ഇലക്ഷന്‍ കമ്മീഷന്റെ നിലപാടുകള്‍ക്കെതിരെയും കോണ്‍ഗ്രസ് നേതാവ് വിമര്‍ശനം ഉന്നയിച്ചു. വോട്ടര്‍ പട്ടികയിലെ പ്രത്യേക തീവ്ര പുനരവലോകനവുമായി ബന്ധപ്പെട്ട് ഉയരുന്ന ആരോപണങ്ങളില്‍ മുഖ്യ തിരഞ്ഞെടുപ്പ് കമ്മീഷണര്‍ ജ്ഞാനേഷ് കുമാറിനെതിരെ ഉയരുന്ന വിമര്‍ശനങ്ങളെ പ്രതിരോധിക്കുന്ന കമ്മീഷന്റെ നടപടിയെ അദ്ദേഹം ചോദ്യം ചെയ്തു. തിരഞ്ഞെടുപ്പ് കമ്മീഷന്‍ നിഷ്പക്ഷമായിരുന്നെങ്കില്‍ തങ്ങളുടെ വീഴ്ചകള്‍ തുറന്നുസമ്മതിക്കുമായിരുന്നുവെന്നും അദ്ദേഹം കൂട്ടിച്ചേര്‍ത്തു.
ഗുവാഹത്തി ഹോട്ടലിലെ വെടിവെപ്പ്: വടക്കുകിഴക്കന്‍ സംസ്ഥാനങ്ങളിലെ അക്രമങ്ങള്‍ക്ക് കാരണം ബി.ജെ.പിയുടെ തെറ്റായ നിയമനങ്ങള്‍: രൂക്ഷ വിമര്‍ശനവുമായി ഗൗരവ് ഗൊഗോയ്
Jaihind TV News Report
Jaihind TV Web Desk
2 min read
37 reads
